नेपाली राजनीतिमा ‘विशिष्ट प्रतिभा’ भएका नेताहरूको कुनै कमी नरहेको दृष्टान्त माओवादी अध्यक्ष प्रचण्ड बनिरहनुभएका बेला उहाँलाई पनि माथ गर्ने क्षमता फोरम लोकतान्त्रिकका अध्यक्ष विजयकुमार गच्छदारले देखाउनुभएको छ । पात्र र परिस्थितिअनुसार कुरा गर्ने धेरथोर क्षमता सबै राजनीतिक दलका नेताहरूमा देखिए पनि प्रचण्डले सबैलाई उछिनेर ‘यस विधामा’ कीर्तिमान कायम गर्नुभएको थियो । तर, अहिले प्रचण्डलाई टक्कर दिन विजयकुमार गच्छदार कस्सिनुभएको उहाँका निकटवर्तीहरूले जनाएका छन् । सम्बद्ध सूत्रका अनुसार विजय गच्छदारले बितेका एक महिनाभित्र माओवादी अध्यक्ष प्रचण्ड, प्रधानमन्त्री डा. बाबुराम भट्टराई, काङ्गे्रस नेता रामचन्द्र पौडेल र एमाले नेता केपी शर्मा ओलीसँग गर्नुभएको संवादले गच्छदारको प्रतिभा उजागर गरेको छ । विभिन्न चार नेताहरूसँग फरक–फरक समयमा गच्छदारले दिनुभएको अभिव्यक्तिको रोचक विवरण यहाँ प्रस्तुत गरिएको छ ।
प्राप्त जानकारीअनुसार माओवादी अध्यक्ष प्रचण्डसँग गच्छदारले भन्नुभएको थियो, ‘अध्यक्षज्यू, गिरिजाबाबुपछि यो देशको सर्वोच्च नेता तपाईं हुनुहुन्छ । तपाईंकै मुख हेरेर हामीले बाबुराम भट्टराईलाई समर्थन गरेका हौँ । वास्तवमा प्रधानमन्त्री बन्नुपर्ने तपाईं नै हो, बाबुरामजीमा सरकार चलाउन सक्ने क्षमता छैन भन्ने महसुस हामीलाई पहिले नै भएको हो, अहिले पुष्टि भइसकेको छ । तपाईंले काँध नथाप्नुभएको भए यो सरकार यहाँसम्म आइपुग्ने नै थिएन । हामी तपाईं नै प्रधानमन्त्री भएको हेर्न चाहन्छौँ, हामी सदा तपाईंको साथमा छौँ ।’
प्रचण्डसँग भेटेको केही दिनमै गच्छदारले प्रधानमन्त्री बाबुराम भट्टराईसँग बालुवाटारमा विशेष भेटवार्ता गर्नुभएको थियो । उक्त भेटवार्ताका क्रममा गच्छदारले भन्नुभएको थियो, ‘डाक्टर साहेव तपार्इं यो देशको सबैभन्दा लोकप्रिय नेता हुनुहुन्छ । तपार्इंकै कारणले शान्ति स्थापना र संविधान निर्माण प्रक्रियाले गति लिने सम्भावना बढेको हो । तपार्इंजस्ता विद्वान् एवम् निष्ठावान नेतासँग काम गर्न पाउनु हाम्रो सौभाग्य हो । तपाईं भएकै कारणले मात्र हामीले साथ दिएका हौँ । तपाईंबाट शान्तिप्रक्रिया पूरा हुनेछ र संविधान पनि तपाईंले नै जारी गर्ने हो । हामी तपाईंलाई काँधमा बोकेर हिँड्न तयार छौँ । निर्वाचन पनि तपाईंकै नेतृत्वको सरकारले गराउनुपर्छ भन्ने हाम्रो धारणा छ ।’
त्यसपछि गच्छदार एक दिन भक्तपुरको बालकोटस्थित केपी ओलीको निवासस्थानमा पुग्नुभयो । ओलीसमक्ष आफ्नो धारणा खुलस्त गर्दै उहाँले भन्नुभयो, ‘ओलीजी, यो देशमा माओवादीलाई टक्कर दिनसक्ने कोही एक मात्र नेता छ भने त्यो तपाईं हो । तपाईंले माओवादीलाई टक्कर नदिनुभएको भए उनीहरूको ज्यादति कति बढ्थ्यो भन्न सकिन्न । माओवादीमा देश चलाउने कुनै क्षमता देखिएन, उनीहरूको कारणले यो देश बर्बाद हुन लागिसकेको छ । अब यिनलाई धेरै दिन यो राष्ट्रले बोक्न सक्दैन । तपार्इं अघि बढ्नुहोस्, हामी तपार्इंलाई सम्पूर्ण रूपले साथ दिन तयार छौँ । माओवादीबाट यो मुलुक बचाउन तपाईं अघि सर्नैपर्छ ।’
नेता ओलीसँग भेटेलगत्तै विजय गच्छदार नेपाली काङ्गे्रसका नेता रामचन्द्र पौडेललाई भेट्न पुग्नुभयो । पौडेललाई गच्छदारले जय नेपाल भनेर सम्बोधन गर्दै भन्नुभयो, ‘दाजु तपाईं मेरो हिजो पनि नेता, आज पनि र भोलि पनि नेता हुनुहुन्छ । कारणबस म अहिले क्षेत्रीय पार्टीमा बस्नुपरेको भए पनि आफ्नो रगत–पसिना परेको काङ्गे्रसप्रति मेरो ममता अझै यथावत् छ । म काङ्गे्रसबाट भावनात्मक रूपले अलग हुनै सक्दिनँ । कम्युनिस्टहरूले देश बर्बाद गरिसके, अब तपाईंजस्ता इमानदार र बौद्धिक नेता अघि सर्नुपर्छ । तपाईंलाई प्रधानमन्त्री बनाउन जस्तोसुकै जोखिम उठाउन पनि म तयार छु । तपाईं अघि बढ्नुहोस्, होइन भने प्रचण्ड–बाबुरामले देश बर्बाद गरिसक्छन् । सरकार तपाईंकै नेतृत्वमा बन्नुपर्छ, बरु तपाईं प्रधानमन्त्री बनेपछि पनि अहिले मैले पाएको उपप्रधानमन्त्री र गृहमन्त्रीको हैसियतचाहिँ कायम राखिदिनुहोला, हामी तपाईंलाई काँधमा बोकेर हिँड्न तयार छौँ ।’
यसरी विजय गच्छदारले फरक–फरक समयमा चार नेतासँग भन्नुभएको कुरा सम्बन्धित नेताहरूबाटै नै घटना र विचारले जानकारी प्राप्त ग¥यो । चार नेतासँग एक गच्छदारले गरेका चार कुराले नेपाली नेताहरूको वास्तविक ‘क्षमता’ उजागर गरेको ठहर हामीले गरेका छौँ । तर, चारमध्ये गच्छदारको सही कुरा के होला ? वास्तवमा चारवटै गलत, सहीचाहिँ जसको सरकार बने पनि ‘आफू उपप्रधानमन्त्रीसहित गृहमन्त्री भइरहन पाउनैपर्छ’ भन्ने मात्र सही भएको पुष्टि हुन्छ ।
प्रतिक्रिया