मधेसवादी दलबाट उदाएर नेकपा एमाले हुँदै नेपाली कांग्रेस प्रवेश गरेका पूर्वमन्त्री जीतेन्द्रनारायण देव कांग्रेस परित्याग गरी पुनः एमालेमा फर्किएका छन् ।

एमाले केन्द्रीय कार्यालय च्यासलमा अध्यक्ष केपी शर्मा ओलीले नेता देवसहित विभिन्न पार्टी परित्याग गरेका व्यक्तिहरुलाई पार्टीमा प्रवेश गराएका हुन् ।

जितेन्द्रनारायण देव पूर्वसंस्कृति, पर्यटन तथा नागरिक उडड्यनमन्त्रीका साथै पूर्वसांसद हुन् । केही समय एमालेमै रहेका उनी नेपाली कांग्रेसअघि मधेसी जनअधिकार फोरम (लोकतान्त्रिक)मा आवद्ध थिए ।

यस्तै लोकतान्त्रिक समाजवादी पार्टी (लोसपा) का वरिष्ठ उपाध्यक्ष अकबाल अहमद साह पनि आजै (१७ असार) एमालेमा प्रवेश गरेका छन् । पार्टी प्रवेश कार्यक्रममा एमाले वरिष्ठ उपाध्यक्ष ईश्वर पोखरेल, महासचिव शङ्कर पोख्रेल र उपमहासचिव प्रदीप ज्ञवालीलगायत सहभागी थिए ।