‘विश्व नेपाली साहित्य महासङ्घ भारत शाखा’की सचिव गीताश्री शर्मा ‘चारूशीला वाङ्मय प्रतिष्ठान, नेपाल’द्वारा ‘चारूशीला साहित्य पुरस्कार २०७९’बाट विभूषित भएकी छन् । भाषा-साहित्यमा उत्कृष्ट सेवा गरेवापत दिइने उक्त प्रतिष्ठित पुरस्कार पाउने गीताश्री पहिलो भारतीय नेपाली साहित्य नारी हुन् ।

नेपाल प्रज्ञा प्रतिष्ठानका पूर्वसदस्य सचिव डा. तुलसीप्रसाद भट्टराईको प्रमुख आतिथ्य र प्रतिष्ठानका अध्यक्ष वरिष्ठ साहित्यकार डा. शैलेन्दुप्रकाश नेपालको अध्यक्षतामा असार पन्ध्रको विशेष दिन सम्पन्न भएको कार्यक्रममा साहित्यकार शर्मालाई प्राज्ञ डा. भट्टराईले उक्त पुरस्कार हस्तान्तर गरेका हुन् ।

चारुशीला वाङ्मय प्रतिष्ठान, नेपालले २०७८/०७९ दुई वर्षको गरेर चौध जना स्रष्टाहरूलाई सम्मानित एवम् पुरस्कृत गरेको थियो । वरिष्ठ साहित्यकार, युवा साहित्यकार, बाल साहित्यकार गरेर साहित्यमा तीन पुस्ता जोड्ने उक्त ऐतिहासिक कार्यक्रममा दुईवटा उत्कृष्ट विद्यालयलाई पनि पुरस्कृत गरिएको थियो ।

समारोहमा साहित्यकार गीताश्री शर्मालाई सम्मान-पत्रसहित नगद पचास हजार नगदले पुरस्कृत गरिएको थियो ।

‘जनपक्ष प्रकाशन’ सिक्किमसँग आबद्ध रहेर लामो समयसम्म भाषा र साहित्यको सेवामा रहनुका साथै मुक्तक, रम्बास, कथा, लघुकथा, सुसेली, गद्यकविता, नियात्रा र समीक्षा जस्ता विभिन्न विधामा कलम चलाएर साहित्यको सेवामा निरन्तर लागिपर्ने सिक्किमेली चेली गिताश्री शर्मालाई साहित्यप्रतिको उनको लगाव र सेवाको कदर गर्दै नेपालको प्रतिष्ठित साहित्य संस्थाद्वारा पुरस्कृत गरिएको हो ।

साहित्यकार शर्माका मुक्ता, तिलस्मी, समयका रेखाहरू, नवीन मुना, वर्षा, अमृतवाणीलगायत विभिन्न विधाका पुस्तक-कृतिहरू प्रकाशित भएका छन् ।