सहकारीको बचत रकम अपचलन गरेको आरोपमा पक्राउ परेका बागलुङ ढोरपाटन नगरपालिकाका नगरप्रमुख इमेज बचत तथा ऋण सहकारीका संस्थापक अध्यक्ष देवकुमार नेपालीलाई जिल्ला अदालत बागलुङमा पेस गरिएको छ ।

१६ महिनादेखि फरार नेपालीलाई केन्द्रीय अनुसन्धान ब्यूरोले गत शनिबार भारतबाट पक्राउ गरी नेपाल ल्याएको थियो । काठमाडौंबाट आइतबार बागलुङ पुऱ्याइएका नेपालीलाई म्याद थप गरी बयान लिइने जिल्ला प्रहरी कार्यालय बागलुङका सूचना अधिकारी सुनिल शर्मा चिलवालले जानकारी दिए ।

चिलवालका अनुसार उनलाई सोमबार (१४ असोज) जिल्ला अदालत बागलुङ पेस गरिएको छ ।

मेयर नेपालीलाई खोज्न गत माघमा ‘रेड कर्नर नोटिस’ जारी भएको थियो । नेपाल प्रहरीले भारतस्थित नेपाली दूतावासमार्फत समन्वय गरेर उनलाई नेपाल ल्याइएको हो ।

सहकारी ठगीमा अध्यक्ष नेपालीसहित सञ्चालक विरुद्ध कास्कीका पाँच सय २४ र बागलुङका एक हजार पाँच सय ४३ बचतकर्ताले गत वर्षको जेठमै उजुरी दिएका थिए ।

देवकुमारलाई पक्राउ गरी बागलुङ लगिएसँगै बचतकर्ताले आफ्नो रकम फिर्ता पाउने आशा गरेका छन् । नगरप्रमुख नेपालीले बागलुङ र पोखराका गरी दुई अर्ब ५० करोड बढी बचत रकम अपचलन गरेको आरोप छ ।