सहकारी ठगी प्रकरणमा प्रहरी हिरासतमा पर्दैगर्दा रास्वपाका सभापति रवि लामिछानेले कानुनी प्रक्रियालाई आफूले सघाउने अभिव्यक्ति दिए पनि इसविपरीत उनको पार्टीले विरोध प्रदर्शनलाई जारी राख्ने भएको छ । आज (७ कात्तिक) पोखराको सृजनाचोकमा रास्वपाले विरोध प्रदर्शन गर्ने भएको छ ।
रास्वपा सभापति लामिछानेलाई सहकारी ठगी प्रकरणमा पक्राउ गरेर ल्याइएसँगै सो दलले पोखरामा विरोध प्रदर्शन गरिरहेको छ । लामिछानेलाई गत शुक्रबार साँझ काठमाडौंबाट पक्राउ गरी शनिबार बिहान पोखरा पुऱ्याइएको थियो । उनलाई आइतबार अदालतमा उपस्थित गराएर ६ दिनको म्याद थप भइ मंगलबारदेखि सरकारी वकीलसमक्ष बयान सुरु भएको छ ।
शनिबार पोखराके चिप्लेढुंगामा शक्ति प्रदर्शन गरेको रास्वपाले आइतबार शहीदचोक, सोमबार पृथ्वीचोकबाट महेन्द्रपुल र मंगलबार जिरोकिमिदेखि अमरसिंहचोकसम्म विरोध प्रदर्शन गरेको थियो । रास्वपाको यस प्रदर्शनका लागि देशभरबाट एक हजार भन्दा बढी नेता ∕ कार्यकर्ता पोखरामा भेला भएको बताइएको छ ।
यसक्रममा रास्वपाको आन्दोलनमा पोखरावासीको साथ नपाएपछि रास्वपाका नेताहरुले घरदैलो गर्दै स्थानीयलाई सरकारविरुद्धको प्रदर्शनमा सहभागी हुन आग्रह गरेका छन् । सो पार्टीका उपसभापति डा. स्वर्णिम वाग्ले, सांसद विराजभक्त श्रेष्ठ, डा. तोसिमा कार्की, सोविता गौतम, मनिष झा, रमेश प्रसाईंलगायतका नेताहरुले स्थानीयको घर-घरमा पुगेर आन्दोलनमा सहभागी हुन आग्रह गरेका छन् ।
प्रतिक्रिया