सहकारीको रकम अपचलन प्रकरणमा अनुसन्धानका लागि प्रहरी हिरासतमा रहेका रास्वपा सभापति रवि लामिछानेलाई अनुसन्धान नगरी रिहाइ गर्नुपर्ने माग राखी सडक प्रदर्शनमा उत्रिएका रास्वपा कार्यकर्तामाथि प्रहरीले अश्रुग्यास प्रहार गरेको छ । पोखराको रत्न चोकमा प्रदर्शन गर्ने क्रममा प्रदर्शनकारीले निषेधित क्षेत्र तोड्ने प्रयास गरेपछि उनीहरुमाथि अश्रुग्यास प्रहार गर्न प्रहरी बाध्य भएको हो । सो क्रममा प्रदर्शनकारी र प्रहरीबीच घम्साघम्सी भएको थियो ।

लामिछानेलाई अनुसन्धानका लागि मंगलबार (२० कात्तिक) कास्की जिल्ला अदालतमा पेस गरिएको छ । यसअघि पाएको म्याद १४ गते नै सकिए पनि तिहार बिदाका कारण उनी प्रहरी हिरासतमै छन् । उनलाई आज अदालतमा उपस्थित गराउन लागिएको छ ।

ज्ञातव्य छ, लामिछानेमाथि सहकारीको रकम अपचलनसँगै संगठित अपराध र सम्पत्ति शुद्धीकरणमा पनि अनुसन्धान भैरहेको छ । सम्पत्ति शुद्धीकरणमा प्रहरीले आवश्यकताअनुसार ९० दिनसम्म हिरासतमा राखेर अनुसन्धान गर्न सक्ने प्रावधान छ । यसक्रममा लामिछानेलाई बयानका लागि रुपन्देही प्रहरीले पनि पत्राचार गरेको छ ।

_{^{file photo}}