धादिङ उद्योग वणिज्य संघको ११औँ अधिवेशनबाट नयाँ कार्यसमितिको लागि हुने निर्वाचनमा धादिङका लोकप्रिय युवा व्यवसायी रोहित भण्डारीले वरिष्ठ उपाध्यक्षमा उम्मेदवारी घोषणा गरेका छन् ।

यही पौष २६ र २७ गते जिल्ला सदरमुकाम धादिङवेसीमा हुन लागेको धादिङ उद्योग वणिज्य संघको ३१औँ साधारणसभा तथा ११औँ अधिवेशनमा भण्डारीले वरिष्ठ उपाध्यक्ष पदमा उम्मेदवारी दिने घोषणा गरेका हुन् ।

शनिबार (१३ पुस) आयोजित एक औपचारिक कार्यक्रमबीच भण्डारीले आफ्नो उम्मेदवारी घोषणा गरेका हुन् । उनको उम्मेदारीलाई धादिङ उद्योग वणिज्य संघका ६ जना पूर्वअध्यक्षहरु तेजबहादुर भण्डारी, ध्रुवबहादुर थापा, प्रभातकिरण सुवेदी, चन्द्रकान्त अधिकारी, वोदनाथ दुवाडी, निवर्तमान अध्यक्ष रुद्रबहादुर खत्री र हालका वरिष्ठ उपाध्यक्ष तथा ११औँ अधिवेशनपछिका अध्यक्ष रामकुमार डल्लाकोटी लगायतले समर्थन जनाएका बुझिएको छ ।

२०४८ सालमा स्थापना भएको धादिङ उद्योग वणिज्य संघमा हाल १ हजार ९ सय १८ अठार सदस्य रहेका छन् । ११औँ अधिवेशनले ३३ जनाको कार्यसमिति चयन गर्नेछ । अधिवेशनबाट वरिष्ठ उपाध्यक्ष र कार्यसमिति सदस्य पदमा निर्वाचन हुने र पछि अध्यक्ष स्वतः वरिष्ठबाट जाने अनि अध्यक्षले कार्यसमितिको बैठकबाट पदाधिकारी चयन गर्ने विधानमा ब्यवस्था रहेको छ ।

यस्ता छन् रोहित भण्डारीका सार्वजनिक प्रतिवद्धताहरु :

✍ धादिङ उद्योग वाणिज्य संघको सचिवालयमा भौतिक रुपले आधुनिक, सेवा प्रवाहका हिसाबले ब्यवसाय मैत्री र क्षमताका हिसाबले सक्षम जनशक्ति सहितको ब्यवसायिक परामर्श केन्द्र स्थापना गर्ने ।

✍ वैध रुपमा जिल्लामा सञ्चालित सबै प्रकारका उद्यम, व्यवसायलाई संघमा आवद्ध गरी उनीहरुको ब्यवसायिक प्रवर्द्धन र बजारीकरणमा प्राथमिकता दिने ।

✍ उद्योग ब्यवसायमैत्री नीतिको तर्जुमा, नीतिहरुको पुनरावलोकन र भयरहित ब्यवसाय विकासको वातावरण तयार गर्न प्रयत्नरत रहने ।

✍ उद्यमशीलता, नेतृत्व विकास र प्राविधिक सीप विकासका कार्यशाला, सेमिनार र प्रशिक्षणहरु संचालन गरी प्रतिस्पर्धात्मक गुणस्तर हासिल गर्न सघाउने ।

✍ मेलाहरुलाई उत्सवका रुपमा संचालन गरी स्थानीय उत्पादनलाई राष्ट्रिय(अन्तराष्ट्रिय रुपमा प्रवर्द्धन गर्दै स्थानीय ब्यवसायीहरु, लगानीकर्ताहरु र अन्तराष्ट्रिय साझेदारहरुबीच अन्तरकृयात्मक वातावरणको सिर्जना गर्ने ।

✍ उद्यमी/ब्यवसायीहरुलाई ऋण वा लगानीका अवसरहरु सुरक्षित गर्न मद्दत गर्ने, वित्तिय संस्थाहरुसंग समन्वय गर्ने एवम् वित्तिय ब्यवस्थापन र अनुपालनका लागि वित्तिय र कानुनी सेवाहरुको अवसर प्रदान गर्ने ।

✍ राष्ट्रिय/अन्तराष्ट्रिय फर्महरुसँग साझेदारीमार्फत नयाँ प्रविधिहरुमा जिल्लाका उद्यम ब्यवसायलाई जोड्ने ।

✍ महिला, विपन्न, सिमान्तकृत समुदाय एवम् अपांगता भएका ब्यक्तिहरुका लागि सम्भाब्य उद्यम ब्यवसाय छनौट गरी उनीहरुको पहुँच स्थापित गर्ने ।

✍ जिल्लाको पर्यटन प्रवर्द्धन, संस्कृतिको संरक्षणका क्षेत्रमा ब्यवसायिक संभाव्यताको थप अध्ययन गरी कार्यक्रम बनाउने ।

✍ जिल्लाको राजमार्ग क्षेत्रमा औद्योगिक क्षेत्र स्थापनाको लागि पहल गर्नुका साथै बुढीगण्डकी जलविद्युत परियोजना यथासिघ्र कार्यन्वयनमा ल्याउन संस्थागत पहल गर्ने ।

✍ जिल्लाको मुख्य आम्दानीको श्रोत रहेको खनिजजन्य उत्पादन, जडीवुटी लगायतको विविधीकरण र बजारीकरणको लागि पहल गर्ने ।

✍ स्थानीय तह स्तरमा उद्योग वाणिज्य संघको भूमिकालाई थप प्रभावकारी बनाउन स्थानीय तह स्तरिय उद्योग वाणिज्य समितिहरु गठन गरि सक्रिय तुल्याउने ।