अमेरिकी राष्ट्रपति डोनाल्ड ट्रम्पले नयाँ ‘गोल्ड कार्ड’ (आवासीय अनुमति) ५० लाख अमेरिकी डलरमा बिक्री गर्ने योजना सार्वजनिक गरेका छन् । परम्परागत ग्रिनकार्डको उच्च मूल्यको संस्करण यस नयाँ भिसाको बिक्रीबाट अमेरिकामा रोजगारी सिर्जना गर्ने र अमेरिकी राष्ट्रिय घाटा कम गर्न प्रयोग गर्न सकिने ट्रम्पले जनाएका छन् ।

‘हामी ‘गोल्ड कार्ड’ भिसा बेच्ने तयारी गरिरहेका छौँ । त्यो कार्डको मूल्य करिब ५० लाख अमेरिकी डलर राख्ने तयारी गरिरहेका छौँ’, ट्रम्पले ओभल अफिसमा पत्रकारहरुसँग भनेका छन् ।

आफ्नो दोस्रो कार्यकालको पहिलो प्राथमिकता लाखौँ गैरकानुनी आप्रवासीलाई देश निकाला गरेका रिपब्लिकन राष्ट्रपति ट्रम्पले नयाँ कार्ड अत्यधिक मूल्यवान् अमेरिकी नागरिकताको मार्ग हुने तर्क गरेका छन् । ‘धेरै मानिसहरू यो देशमा बस्न चाहन्छन्, उनीहरूले काम गर्न, रोजगारी प्रदान गर्ने कम्पनीहरू निर्माण गर्न सक्षम हुनेछन् र यसरी आउने पैसा भएका मानिसहरू नै हुनेछन्’, राष्ट्रपति ट्रम्पको जिकिर छ ।

करिब दुई हप्ताभित्र कार्डको बिक्री सुरु हुने जानकारी दिँदै ट्रम्पले भनेका छन्, ‘हामी यी कार्डहरूमध्ये १० लाख बिक्री गर्न सक्षम हुनेछौं । हामीले यो सबै काम अमेरिकी कानुनअनुरूप नै गरेका छौं ।’

उनले नयाँ गोल्ड कार्डको लागि सबै आवेदकहरूलाई सावधानीपूर्वक जाँच गरिने उल्लेख गर्दै धनी रुसीहरुले पनि आवेदन दिनेसक्ने सम्भावना रहेको औंल्याए । ‘म केही रूसी कुलीन वर्गहरूलाई चिन्दछु जुन धेरै राम्रा मानिस हुन्, त्यसैले यो सम्भव छ’, ट्रम्पको भनाइ छ ।

तीन वर्षअघि मस्कोले युक्रेनमाथि आक्रमण गरेयता थुप्रै रुसी कुलीन वर्गपश्चिमी प्रतिबन्धको चपेटामा परेका छन् । अमेरिकी राष्ट्रपति ट्रम्पले पत्रकारहरूसँग कुरा गर्दै रुसमाथिको प्रतिबन्ध फुकुवा गर्न कुनै न कुनै समयमा सम्भव भए पनि अहिले वार्ताको टेबलमा नरहेको बताए ।

ओभल अफिसमा ट्रम्पको छेउमा उभिएका अमेरिकी वाणिज्य मन्त्री हावर्ड लुटनिकले गोल्ड कार्डको बारेमा भने, ‘हामी त्यो पैसा हाम्रो घाटा कम गर्न प्रयोग गर्न सक्छौँँ ।’ लामो व्यावसायिक करियरमा होटल र क्यासिनोको शृङ्खलाबद्ध ब्रान्डिङ गरेका ट्रम्पले नयाँ कार्डको नाम पनि आफ्नो नाममा राख्न सकिने सुझाव उनको छ ।