राजसंस्था पुनःस्थापनासहितको आन्दोलनका क्रममा आज (१५ चैत) काठमाडौंको तीनकुने क्षेत्रमा भएको प्रदर्शनका क्रममा एक जनाको मृत्यु र ३५ जना घाइते भएका छन् ।

गृह मन्त्रालयले शुक्रबार सँझ आयोजना गरेको पत्रकार सम्मेलनमा मन्त्रालयका सहसचिव छवि रिजालले प्रदर्शनका क्रममा भएको झडपमा घाइते भएका कीर्तिपुरका २९ वर्षीय सविन महर्जनको मृत्यु भएको जानकारी दिए ।

‘झडपमा घाइते भएका महर्जनको महाराजगञ्जस्थित त्रिवि शिक्षण अस्पतालमा उपचारका क्रममा मृत्यु भएको हो, काठमाडौंका विभिन्न स्थानमा भएको प्रदर्शनका क्रममा ३५ जना घाइते भएका छन्’, सहसचिव रिजालले भनेका छन् ।

गृह मन्त्रालयका अनुसार प्रदर्शनकारीतर्फ २३, सशस्त्र प्रहरीतर्फ नौ र नेपाल प्रहरीतर्फ तीन जना घाइते भएका छन् ।

शुक्रबारको आन्दोलनका कमाण्डर दुर्गा प्रसाईंलाई कारबाहीको दायरामा ल्याउनुका साथै आन्दोलनबाट भएको क्षतिको जिम्मेवारी आयोजकले लिनुपर्ने उनको भनाइ छ ।

_{^{Representative image}}