अमेरिकामा गोली लागी मृत्यु भएका गोरखाका एकै घरका चार जनाको अन्त्येष्टि गर्न जान नपाएको मृतकका परिवारजनले गुनासो गरेका छन् ।

गत जेठको अन्तिम साता भर्जिनियामा मृत भेटिएका गोरखाको पालुङ्टार-८ रातामाटेका ३८ वर्षीय सन्तोष परियार, उनकी ३६ वर्षीया श्रीमती अञ्जु श्रेष्ठ, आठ वर्षीया छोरी साइना र दुई वर्षीय बालक ओम परियारको अन्त्येष्टि गर्न जान नपाएको परिवारजनको गुनासो छ ।

अन्त्येष्टिका लागि मृतक सन्तोषका बुबा निरबहादुर खाती दम्पतीले प्रयास गरे पनि जान नपाएको वडाअध्यक्ष होपबहादुर नेपालीको भनाइ छ । ‘मृतक सन्तोष परियारको कान्छा भाइ सुवास परियार अमेरिकी सेनामा हुनुहुुन्छ । यताबाट बुबाआमा अन्त्यष्टिका लागि जान खोज्नुभएको थियो तर दूतावासमा कागजात मिलेको छैन, अब सेनामा रहेको भाइले नै काजकिरिया गर्नुपर्ने भयो’, वडाध्यक्ष नेपालीले बताए ।

सन्तोष पहिले नेपालस्थित अमेरिकी दूतावासमा कार्यरत थिए । करिब १२ वर्ष दूतावासमा जागिर खाएपछि आठ वर्षअघि उनी जहान परिवारसहित अमेरिका गएका थिए ।

गत जेठ २२ गते उनीहरु भर्जिनियाको मनासस पार्कस्थित लानाए लेन ९४ ब्लकमा रहेको अपार्टमेन्टमा गोली लागी हत्या भएको अवस्थामा फेला परेका थिए । सन्तोषको परिवार विगत आठ वर्षदेखि अमेरिका बस्दै आएको वडाअध्यक्ष नेपालीको भनाइ छ ।