पूर्वी पहाडी तथा तराईका जिल्लामा लगातार भएको वर्षाका कारणले सप्तकोशी नदीमा आइतबार बिहानदेखि पानीको बहाव वृद्धि भएको छ ।

साँझ ७ बजेको मापनअनुसार कोसी ब्यारेज भएर एक लाख ८९ हजार ३९० प्रतिसेकेन्ड क्युसेक पानीको बहाव रहेकामा राति ८ बजे एक लाख ९१ हजार २१० प्रतिसेकेन्ड क्युसेक पानीको बहाव मापन भएको छ ।

सशस्त्र प्रहरी उपरीक्षक निर्मल थापाका अनुसार हाल ५६ मध्ये २७ वटा ढोका खुला गरिएका छन् । नदीमा पानीको बहाव बढे पनि कुनै समस्या नरहेको प्रमुख जिल्ला अधिकारी धर्मेन्द्र मिश्रको भनाइ छ ।

कोशी ब्यारेज भएर एक लाख ५० हजारभन्दा माथि पानीको बहाव पुगेमा खतराको सङ्केतस्वरुप रातो बत्ती बाल्ने गरिएको छ । सोही अनुसार रातो बत्ती बालिएको कोशी ब्यारेज कन्ट्रोल रूमले जनाएको छ ।

_{^{file photo}}