नख्खु कारागारमा रहेका रास्वपा सभापति रवि लामिछानेलाई नेकपा (माओवादी केन्द्र)का अध्यक्ष प्रचण्डले बुधबार (४ भदौ) भेट गरेका छन् । लामिछानेसँग भेटघाट गरी कारागारको बसाइका बारेमा जानकारी लिनुका साथै बसाइमा भएको सहजता/असहजताका विषयमा प्रचण्डले चासो राखेको उनको सचिवालय सदस्य दीपक भण्डारीले जानकारी दिएका छन् ।

थुनामा रहेका लामिछानेले भैरहवा कारागारको भन्दा नख्खुमा धेरै राम्रो सेवासुविधा भएको भन्दै कारागार प्रशासनको प्रशंसा गरेको पनि भण्डारीको भनाइ छ ।

यसरी नख्खु कारागार पुगेर प्रचण्डले लामिछानेसँग भेटघाट गरेको सन्दर्भलाई विश्लेषकहरुले विभिन्न कोणबाट अर्थ्याएका छन् । ठगी अभियोगमा जेल परेका ब्यक्तिलाई सहानुभूति दर्शाउनका लागि मात्र भन्दापनि राजनीतिक स्वार्थ वा अभीष्टशिद्धिकै लागि रणनीतिक रुपले प्रचण्डले लामिछानेसँग भेट गरेका हुनसक्ने अनुमान धेरैले गरेका छन् ।