सानिमा बैंक लालबन्दी शाखाद्वारा संस्थागत सामाजिक उत्तरदायित्व अन्तर्गत सर्लाही जिल्लाका दुई जना गरिब तथा जेहेन्दार विद्यार्थीलाई छात्रवृत्ति प्रदान गरेको छ । विभिन्न निकायका प्रतिष्ठित व्यक्तिहरू सम्मिलित छनौट समितिद्वारा छानिएका सुश्री युनिका काफ्ले र सुश्री सोनी भुजेललाई छात्रवृत्ति प्रदान गरिएको हो

उक्त छात्रवृत्तिअन्तर्गत शैक्षिक शुल्क, शैक्षिक सामग्री र नगदवृत्ति रु. २,००० (प्रति महिना) गरी प्रत्येक विद्यार्थीलाई ५० हजारसम्मको छात्रवृत्ति प्रदान गरिने सानिमा बैंक लालबन्दी शाखाका शाखा प्रवन्धक प्रितम त्रिपाठीले जानकारी दिएका छन् ।

सानिमा बंैकको २१औं वार्षिकोत्सवको अवसरमा लालवन्दी शाखामा आयोजित समारोहमा लालवन्दी नगरपालिकाका प्रमुख वासुदेव अधिकारीबाट लाभान्वित विद्यार्थीहरूलाई उक्त छात्रवृत्ति हस्तान्तरण गरिएको छ । यस्ता कार्यक्रमबाट गरिब तथा जेहेन्दार विद्यार्थीहरु लाभान्वित भएको र बैंकको शैक्षिक विकासमा उच्च योगदान रहेको भन्दै मेयर अधिकारीले खुशी व्यक्त गरेका छन् ।

ज्ञातव्य छ, सानिमा बैंकले गत २०६८/६९ देखि काठमाडौं उपत्यकाबाहिर रहेका प्रत्येक शाखाबाट ११ र १२ पढ्नका लागि २-२ जना विद्यार्थीहरुलाई उच्च शिक्षा हासिल गर्न छात्रवृत्ति प्रदान गर्दै आइरहेको छ ।