दक्षिण कोरियाको एक अदालतले पूर्वप्रधानमन्त्री हान डकसुलाई नागरिक शासनलाई केही समयका लागि निलम्बन गर्ने मार्सल लको घोषणामा सहयोग र उक्साहट गरेको अभियोगमा २३ वर्षको जेल सजाय सुनाएको छ ।

सियोल केन्द्रीय जिल्ला अदालतका न्यायाधीश ली जिन-ग्वानले प्रतिवादीले अन्त्यसम्म प्रधानमन्त्रीका रूपमा आफ्नो कर्तव्य र जिम्मेवारीलाई बेवास्ता गरेको ठहर गर्दै फैसला सुनाए । अदालतले अभियोजकले मागेको सजायभन्दा आठ वर्ष बढी कैद तोकेको हो ।

७६ वर्षीय अनुभवी टेक्नोक्रेट हानलाई फैसला सुनाइएपछि तुरुन्तै जेलमा उपस्थित हुन आदेश दिइएको छ । न्यायाधीश लीका अनुसार तत्कालीन राष्ट्रपति युन सुक योलले डिसेम्बर २०२४ मा जारी गरेको मार्सल ल डिक्री ‘संवैधानिक व्यवस्थालाई बिगार्ने उद्देश्य’का साथ ल्याइएको थियो र त्यसलाई विद्रोहसरह मान्नुपर्ने अवस्था देखिएको छ ।

युनको आश्चर्यजनक मार्सल ल घोषणापछि विपक्षी नेतृत्वको संसद्ले त्यसलाई भिटो गर्नुअघि राष्ट्रिय सभा र राष्ट्रिय निर्वाचन आयोगमा सशस्त्र सेना तैनाथ गरिएको थियो । यस घटनाक्रमपछि युनलाई अप्रिलमा संवैधानिक अदालतले महाभियोगमार्फत पदबाट हटाएको थियो र दुई महिनापछि उपचुनाव प्रक्रिया सुरु भएको थियो ।

हान पनि युनसहित ती पूर्व उच्च अधिकारीहरूमध्ये पर्छन्, जसले मार्सल ल प्रयासमा खेलेको भूमिकाका कारण मुद्दा भोगिरहेका छन् । न्यायाधीश लीले टेलिभिजनमार्फत फैसला सुनाउँदै हानले ‘युन र अन्यको विद्रोही कार्यमा कम्तीमा पनि औपचारिक रूपमा प्रक्रियागत आवश्यकताको पालना सुनिश्चित गरेर महत्त्वपूर्ण भूमिका खेलेको’ ठहर गरेका छन् ।

मुद्दाको सुनुवाइका क्रममा हानले आफूले कहिल्यै मार्सल ल घोषणालाई समर्थन वा सहयोग नगरेको दाबी गर्दै कुनै पनि गलत कार्यमा संलग्न नभएको जिकीर गरेका थिए ।

गत अप्रिलमा युन पदबाट हटाइएपछि हान कार्यवाहक राष्ट्रपतिको भूमिकामा पुगेका थिए र एक समय आकस्मिक चुनावमा बलियो रूढीवादी दावेदारका रूपमा पनि हेरिएका थिए । तर मे महिनामा राष्ट्रपतिको उम्मेदवारी दिने प्रयासका क्रममा युनको दलले उनलाई आधिकारिक उम्मेदवार नबनाएपछि, उनको राजनीतिक अभियान एक्कासी कमजोर बनेको थियो ।