रास्वपाका वरिष्ठ नेता बालेन्द्र साहसँग पश्चिम नेपालको चुनावी यात्रामा सहभागी भएको अवस्थामा बेहोस भएपछि उपचारका लागि काठमाडौं ल्याइएका पत्रकार दिनेश सिटौलाको उपचारकै क्रममा ग्रान्डी अस्पतालमा निधन भएको छ । ग्रान्डी अस्पतालले विज्ञप्ति जारी गर्दै आज (१८ माघ) १२ः४५ बजे सिटौलाको निधन भएको जनाएको छ ।

रास्वपाका वरिष्ठ नेता तथा झापा ५ का उम्मेदवार बालेन्द्र साहसँग चुनाव प्रचारका लागि गत शुक्रबार अछाम पुगेका सिटौला एक्कासी बेहोस भएर ढलेका थिए । मंगलसेन नगरपालिका-४ बाँगापाटामा अचानक अचेत भएका सिटौलालाई सुरुमा जिल्ला अस्पताल पुर्‍याइएको थियो । त्यसपछि सेनाको हेलिकोप्टर र प्लेनमा सुर्खेत हुँदै काठमाडौं ल्याइएका उनको भेन्टिलेटरमा राखेर उपचार थालिएको थियो ।

काठमाडौंस्थित ग्रान्डी अस्पतालमा पुर्‍याएपछि उनको उपचार आईसीयूमा राखेर सुरु भएको थियो । उपचारमा संलग्न एक चिकित्सकका अनुसार सिटौलालाई ब्रेन ह्यामरेज पुष्टि भएको छ ।

बालेनका सहयोगी भूपदेव शाहको घरमा चिया खाएर निस्कने क्रममा स्कारपियो गाडीबाट ओर्लन खोज्दा सिटौला ढलेर टाउकामा चोट लागेको थियो । सो समयमा बालेन साह पनि साथैमा थिए । सिटौला बालेनको टोलीमा पत्रकारका रूपमा नभइ टोली सदस्यका रूपमा सहभागी थिए।

चलचित्र पत्रकार संघका पूर्व अध्यक्षसमेत रहेका सिटौला ‘द सिनेमा टाइम्स’ अनलाइन पोर्टलका सम्पादक हुन् ।

सिटौलाको मृत्यु रहश्यपूर्ण रहेको भन्दै टीकाटिप्पणी शुरु भएको छ ।