नेकपा एमालेको सचिवालय बैठकले पार्टीका अध्यक्ष एवम् पूर्वप्रधानमन्त्री केपी शर्मा ओलीलाई तत्काल रिहा गरिनुपर्ने माग गरेको छ । आज (१४ चैत) बिहान बसेको बैठकले ओलीप्रति प्रतिशोधपूर्ण ब्यवहार गरिएको आरोपसहित दृढताको साथ कानुनी तथा राजनीतिक रूपमा सशक्त प्रतिवाद गरिने निर्णय गरेको छ ।

यस्तै, प्रत्येक जिल्लाको सदरमुकाममा आज अपराह्न ३ बजे जनसंगठनहरूको तर्फबाट विरोध प्रदर्शन गर्ने र प्रत्येक जिल्लामा भोलि चैत्र १५ गते १२ बजे जिल्ला पार्टी कमिटीको आयोजनामा व्यापक प्रदर्शनसहित प्रमुख जिल्ला अधिकारीको कार्यालयमा विरोधपत्र बुझाउने निर्णय बैठकले गरेको छ ।

लोकतन्त्र र कानुनी राज्यका पक्षधर सबै दलहरूसँग संवाद र सहकार्य गर्ने तथा नागरिक समाज र आम जनसमुदायसंग सहकार्य गर्ने एमाले बैठकको निर्णय छ ।

यसैबीच, केपी ओलीलाई प्रतिशोधपूर्ण तथा बदलाभावले गरिएको पक्राउको विरोधमा आज अपराह्न ३ बजे माइतीघरमा जनसंगठनहरूको तर्फबाट विरोध प्रदर्शन गरिने एमालेका सचिव महेश बस्नेतले जानकारी दिएका छन् ।

_{^{photo: rss}}