फैसला कार्यान्वयनका लागि जिल्ला अदालत पठाइयो

चेक अनादर मुद्दामा दुई वर्ष कैद सजाय भई फरार रहेका फणिन्द्र नेपाललाई प्रहरीले बूढानीलकण्ठबाट पक्राउ गरी कारवाही अगाडि बढाएको छ ।

काठमाडौं उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक रामेश्वर कार्कीले जानकारी दिएअनुसार काठमाडौं बूढानीलकण्ठ नगरपालिका–१० रहँदै आएका ६७ वर्षीय नेपाललाई युवराज खत्री नामक ब्यक्तिको उजुरीका आधारमा पक्राउ गरिएको हो ।

वादी युवराज खत्री र प्रतिवादी निज फणिन्द्र नेपाल भएको चेक अनादर मुद्दा ९०७७-सी४-१६१५० मा काठमाडौं जिल्ला अदालतको फैसलाले बिगोबापत दुई वर्ष कैद सजाय ठहर भई फरार रहेका निजलाई बूढानीलकण्ठ-१० कटारी बस्तीबाट पक्राउ गरिएको जनाइएको छ ।

पक्राउ परेका नेपाललाई फैसला कार्यान्वयनका लागि काठमाडौं जिल्ला अदालत बबरमहल पठाइएको प्रवक्ता कार्कीले बताए ।