वाइल्ड लाइफबारे सुन्ने–जान्ने सोख राख्ने व्यक्तिका निम्ति यो रोचक खबर हुन सक्छ कि बेलायतको पेम्ब्रोकसेरस्थित फोली फार्म जूमा एउटा यस्तो जिराफ छ जो अन्य सामान्य जिराफभन्दा चार गुणा लम्बाइको छ । जुलु नाम दिइएको उक्त जिराफ २० फिट अग्लो रहेको बताइन्छ । पाँच वर्षअघि नेदरल्यान्डबाट बेलायत पुर्‍याइएको १८ वर्ष उमेरको उक्त जिराफ संसारकै सबभन्दा लामो जिराफ भएको दाबी गरिए पनि आधिकारिक तवरले प्रमाणित भने भइसकेको छैन । तथापि, जङ्गली जनावरको क्षेत्रमा काम गर्ने विश्वकै धुरन्धरहरूले पनि आजसम्म अन्यत्र कहीँकतै यस आकारको जिराफ नदेखेको अभिव्यक्ति दिएर जुलुको सर्वोच्चतामाथि लालमोहर लगाइदिएका छन् । उक्त जू अवलोकनमा पुग्ने जो–कोहीको ध्यान पनि उक्त जिराफले खिच्ने गरेको छ भने मानिसले प्रदान गर्ने स्नेहप्रति जुलु पनि नतमस्तक रहने गरेको सम्बन्धित जूका कर्मचारी बताउँछन् । सामान्य आकारप्रकारभन्दा निकै ठूलो भएर पनि जुलुले संयमित व्यवहार प्रदर्शनका साथै अवलोकनकर्तासँग मित्रवत् व्यवहार गर्ने गरेबाट यसले धेरैको मन जितेको छ । दिनमा १८ किलो घाँस र थप तीन–चार किलो रेगुलर डाइट खुवाएर जुलुको विशेष हेरचाह गर्ने गरिएको जूका अधिकारीको कथन छ ।