सबै ठान्दछन् गोही एक हिंस्रक तथा खतरनाक जनावर हो, तर यी मोडल यो सावित गर्ने धुनमा छिन् कि गोही हामीले सोचेजस्तो खतरनाक या नराम्रो स्वभावको जनावर होइन । यस्तो सन्देश प्रवाहित गर्ने उद्देश्यले साहसी इटालियन मोडल रोबर्टा म्यानसिनोले गोहीको अत्यन्त नजिक पुगी फोटो खिचाउने सोच बनाइन् । वास्तवमा यो उनको जीवनकै एक सपना पनि थियो । आफ्नो सपना साकार पार्न उनी मेक्सिकोको बैन्को चिन्चोरो नामक गोहीको वासस्थान पुगिन् र गोहीअघिल्तिर विभिन्न पोज दिँदै फोटो सुट गराइन् । गोहीले पनि सुन्दर मोडल रोबर्टाको सुन्दरता आरामसाथ नियालिरह्यो, आक्रमणको कुनै प्रयास गरेन । रोबर्टाले आफ्नो बाल्यकालदेखिको यो सपना पूरा गर्नुअघि दश घन्टासम्म स्विमिङको विशेष अभ्यास गरिन् र गोहीको स्वभावबारे सक्दो जानकारी पनि उनले लिएकी थिइन् । त्यसपछि मात्र चार मिटर लम्बाइ भएको एक गोहीलाई अघिल्तिर राखी उनले तस्बिर खिचाएकी थिइन् । यतिबेला रोबर्टाको यो साहसपूर्ण मोडलिङ–तस्बिर सामाजिक सञ्जालमा भाइरल बनेको छ ।