दर्जनभन्दा बढी अध्यक्षका प्रतिस्पर्धी

महाधिवेशन गर्न भएको आठौँ प्रयास सफल भयो भने नेपाली कांग्रेसको भ्रातृ संस्था नेपाल विद्यार्थी सङ्घको एघारौँ महाधिवेशन आगामी साउन २३, २४ र २५ गते काठमाडौंमा हुने भएको छ । नेविसङ्घको विधानमा हरेक दुई वर्षमा अधिवेशन गर्नुपर्ने व्यवस्था भए पनि २०६४ सालमा दशौँ महाधिवेशन भएयता सङ्घको अधिवेशन हुन सकेको छैन । यसअघि सातपटक महाधिवेशनको तिथि तय भएर पनि सातैपटक अन्तिम अवस्थामा आएर स्थगित हुने गरेको थियो । त्यसैले यसपटक पनि निर्धारित मितिमा महाधिवेशन सम्पन्न हुन्छ भन्नेमा विद्यार्थी नेताहरू विश्वस्त हुन सकेका छैनन् ।

तथापि, अधिवेशनमा सङ्घको अध्यक्ष बन्ने प्रतिस्पर्धामा उत्रन करिब एक दर्जन विद्यार्थी नेताले आफूलाई अगाडि सारेका छन् । कतिपय विद्यार्थी नेता पार्टीनेताको आशीर्वाद लिएर मैदानमा आउने तयारी गर्दै छन् भने कतिपयले एउटा गुटविशेषको प्रतिनिधि बनेर मैदानमा उत्रने जाँगर चलाएका छन् । केही विद्यार्थी नेताहरूले चाहिँ गुटको राजनीति अन्त्य गर्नुपर्ने नारासहित चुनावी मैदानमा आउने तयारी गरिरहेका छन् । मनोजमणि आचार्य र नीलकण्ठ रिजालले नेता रामचन्द्र पौडेलको आशीर्वाद प्राप्त गर्न कसरत गरिरहेका छन् । आफूलाई उम्मेदवार बनाए विश्वप्रकाश शर्माको समेत सहयोग हुने र विजय बन्न सकिने भन्दै मनोजले पौडेल पक्षको उम्मेदवार बन्ने प्रयास गरिरहेका छन् । नीलकण्ठ रिजालभन्दा मनोज बलियो भएकोले अन्तत: रामचन्द्र पौडेल पक्षले मनोजमणिलाई नै अध्यक्षको उम्मेदवार बनाउने सम्भावना छ ।

त्यसैगरी सभापति शेरबहादुर देउवाको समर्थन प्राप्त गर्न नैनसिंह महर र जितजंग बस्नेतबीच प्रतिस्पर्धा चलेको छ । महर र बस्नेत दुवै बलिया उम्मेदवार मानिन्छन्, तर बस्नेतको उमेर अलि बढी भएकोले विद्यार्थीले उनको विकल्पलाई साथ दिने हुन् कि भन्ने अनुमान कतिपयले गरेका छन् । सभापति देउवाको समर्थन प्राप्त गर्न सके भने महरले मनोजमणिलाई रामै्रसँग टक्कर दिने विश्वास गरिन्छ । पार्टीमा बिरालो चालले आफ्नो बेग्लै सञ्जाल निर्माण गर्ने प्रयासमा रहेका नेता कृष्णप्रसाद सिटौलाले पनि नेविसङ्घको अध्यक्षमा आफ्नो बेग्लै उम्मेदवार खडा गर्ने योजना बनाएका छन् । उनले विद्यार्थी नेता कुन्दन काफ्लेलाई अध्यक्षको उम्मेदवार बनाउने सम्भावना छ ।

०४६ देखि निरन्तर विद्यार्थी राजनीतिमा सक्रिय रहँदै आएका आनन्दराज त्रिपाठीले भने सबै नेताहरूको समर्थन लिएर अध्यक्षको उम्मेदवार बन्ने प्रयास गरेका छन् । यसअघि दुई कार्यकाल केन्द्रीय सदस्यको जिम्मेवारी पूरा गरिसकेका आनन्दले गुटविहीनताको नारा दिएका छन् । सबैको समर्थन लिन खोज्दा कुनै पनि नेताको समर्थन नमिल्ने खतरा रहँदारहँदै पनि उनले गुटबन्दीलाई निरुत्साहित गर्न दर्शाएको प्रतिबद्धताको विद्यार्थीले उच्च प्रशंसा भने गरेका छन् । त्यसैले आनन्द पनि अध्यक्षको बलियो उम्मेदवारका रूपमा गनिएका छन् । यीबाहेक सरोज थापा, विनिता अधिकारी र रामप्रसाद अधिकारीले पनि अध्यक्षको उम्मेदवार बन्ने चाहना सार्वजनिक गरेका छन् । महाधिवेशनमा कुल तीन हजार असी प्रतिनिधिको सहभागिता रहनेछ ।