झण्डै एक दशकपछि कात्तिक २७ गतेदेखि पर्यटकीय सुन्दर नगरी पोखरामा नेपाली कांग्रेसको भातृ संगठन नेपाल तरुण दलको चौथो राष्ट्रिय महाधिवेशन शुरु हुँदै छ । माछापुच्छ«े हिमाल र फेवतालको रमणीय दृष्य त छँदैछ तर कांग्रेसजनले यतिखेर सुन्दर नगरी पोखरालाई बेहुली सिँगारेजस्तै गरी सजाएका छन् । पटक–पटक घोषणा हुँदै स्थगन भइरहेको तरुण दलको महाधिवेशन यसपटक पनि स्थगित हुने अनुमान धेरैले काटेका थिए । नेपाल तरुण दलका संस्थापक अध्यक्ष बालकृष्ण खाणलाई नेपालगञ्जको कांग्रेस महासमिति बैठकबाट उक्त जिम्मेवारी सुम्पिएर नेपाली तरुणलाई प्रजातान्त्रिक बनाउने अभियान अनुरुप यतिखेर चौथो महाधिवेशन हुने तयारी भइरहेको छ । संस्थापक अध्यक्ष खाणलाई महाधिवेशन गर्न निर्देशन समितिको संयोजक तोकेपछि यस पटक महाधिवेशन हुने पक्का भएको छ । महाधिवेशन हुने निश्चित भएपछि सयौको सख्यामा तरुणहरुले उम्मेदवारी घोषणा गरेका छन् । भावी तरुण दल कस्तो र कसरी हाँक्ने भनेर आ–आफ्ना योजना र विचार पनि राख्न थालिएको छ । यसै प्रसंगमा महाधिवेशनमा अल्प संख्यक पिछडा वर्गबाट केन्द्रीय सदस्यमा उम्मेदवारी घोषणा गरेका तरुण नेता धनबहादुर छन्त्याल (लक्ष्मण) र खुला तर्फ केन्द्रीय सदस्यमा उम्मेदवार घोषणा गरेका जुझारु तरुण नेता एवं महाधिवेशन स्वंसेवक एवम् युवा परिचालनका संयोजक सुरजजंग राणासँग महाधिवेशनका विषयमा गरिएको संक्षिप्त कुराकानी :
खाण दाइको पालामा जस्तै तरुण बन्नुपर्छ
– धनबहादुर छन्त्याल ‘लक्ष्मण’ (के.स.उम्मेदवार)
० लक्ष्मणजी अब त महाधिवेशन सर्दैन होला नि होइन ?
– यो त अब सवाल नै रहेन, महाधिवेशन सर्ने कुरा असम्भव भइसक्यो । पोखरामा सबै तयारी पुरा भइसक्यो । हजारौ तरुणहरु हर्षले गदगद भएका छन् ।
० प्रतिनिधिको विवाद कायमै छ, महाधिवेशन कसरी सम्पन्न होला त ?
– महाधिवेशन अब कसैले चाहेर पनि रोक्न सक्दैन । काम गर्ने क्रममा झिन मसिना विवाद भइहाल्छन् । त्यस्ता विवादलाई निर्देशन समितिले मिलाउने कुरामा म ढुक्क छु । वल्ल–वल्ल हुन लागेको महाधिवेशनमा सबै साथीहरुले नकारात्मक सोच र चिन्तनलाई छाडेर सकारात्मक सोचका साथ अघि बढ्नुपर्छ ।
० असन्तुष्ट पक्षले त पेलेर गए समानान्तर समिति बनाउने चेतावनी दिँदै छन् त ?
– अब देशमा निर्वाचन हुँदै छन् । कांग्रेसको इञ्जिन भनेको तरुणदल हो । कांग्रेसको भलो सोच्नेले यस्ता बेतुकका चेतावनी दिन सक्दैनन् ।
० यो महाधिवेशनमा तपाईं पनि उम्मेदवार हुनुहुन्छ, कस्तो छ पोजिसन ?
– मैले अल्पसंख्यक पिछडा वर्गको नेतृत्व गर्ने सोचले केन्द्रीय सदस्यको उम्मेदवारी दिँदैछु । मुलुकभरका तरुण साथीहरूले सपोर्ट गरेका छन् ।
० तपाईं सदस्य बन्नुभयो भने तरुण दल कस्तो हुनुपर्छ भनेर आवाज उठाउनुहुन्छ ?
– नेपाल तरुण दलका संस्थापक अध्यक्ष आदरणीय दाजु बालकृष्ण खाणको नेतृत्वमा रहेको तरुण दलजस्तो चुस्त र दुरुस्त बनाउन लाग्ने छु ।
० नेताको चाकडी गर्न यसो भन्नुभएको त होइन ?
– अकबरी सुनलाई कसी लगाउन नपरे जस्तै खाणदाइलाईको त्यो समयको कमाण्ड ऐतिहासिक थियो । मध्यावदी निर्वाचनबाट तल झरेको कांग्रेसलाई बहुमत दिलाउन त्यो बेलाको तरुण दलको योगदान रहेको ध्रवसत्य कुरालाई कसैले बङ्ग्याउनु हुँदैन । ०६५ मा आफू निर्वाचन नलडेर पार्टीलाई बहुमत दिलाएको कुरा बिर्सन मिल्दैन ।
० तरुणदलको चुनौती के देख्नुभएको छ ?
– नेपाली कांग्रेसका श्रद्धेय तत्कालीन सभापति एवम् प्रधानमन्त्री सुशील कोइरालाको नेतृत्वमा बनेको संविधानलाई कार्यान्वयन गराउन तरुण दलको नेतृत्वदायी भूमिका हुनु पर्छ ।
०००
तरुण दल गुट–उपगुटबाट मुक्त हुनुपर्छ
– सुरजजंग राणा (केन्द्रीय सदस्यका उम्मेदवार)
० सुरजजी अबको तरुण दल कस्तो हुनुपर्ला ?
– मुलुक गणतान्त्रिक संघीय शासन हुँदैछ । पार्टीको नेतृत्वदेखि सरकारको गाउँपालिकादेखि अन्य निर्वाचन गर्ने कुरा अघिसारिएका छन् । कम्युनिष्टहरु कांग्रेसलाई शक्तिमा जान नदिनका लागि एक हुन सक्छन् । यी कुरालाई मनन गरी यो महाधिवेशनले गुट उपगुटको अन्त्य गरी कांग्रेसी तरुण एक छन् भन्ने सन्देश दिनुपर्छ ।
० तपाईको उम्मेदवारी केका लागि हो नि ?
– संस्था रह्यो भने मात्र व्यक्ति रहन्छ भन्ने कुरालाई सबैले बुझ्न जरुरी छ । नेपाली कांग्रेसलाई बलियो बनाउन हामीले सभापतिलाई बलियो बनाउनु पर्दछ । सभापतिलाई बलियो बनाउन तरुण दलको ठूलो भूमिका रहन्छ । मेरो उममेदवारी देशभरका वडा गाउँ, क्षेत्र र जिल्लामा तरुणको संगठन बलियो बनाउनका लगि हो ।
० पहिला त यस्तै कुरा सबैले गर्छन् तर निर्वाचनमा विजय भएपछि कांग्रेसहरु त चिर निद्रामा रहन्छन् भनिन्छ नि हो ?
– यो गलत कुरा हो । तपाईंले भनेझै कोही तरुण चिर निद्रामा बसे भने उसको निद्रा खुलाउन झकझकाउने काम पनि हामीबाट हुनेछ ।
० यदि तपाइले निर्वाचनमा सफलता हासिल गर्नुभयो भने पहिलो बैठकमा के कुरा राख्नुहुन्छ ?
– देशबाट हजारौंको संख्यामा बाहिरिएको युवाको श्रम शक्तिलाई स्वदेशमै रोजगारीको व्यवस्था गर्न तरुणदलले नेतृत्व गर्नुपर्ने कुरा मेरो पहिलो प्राथमिकता हुनेछ । त्यसपछि आन्तरिक लोकतन्त्रलाई पनि मजबुद बनाउनुपर्छ भन्ने मेरो सुझाव हुनेछ ।
० कांग्रेसमा आन्तरिक लोकतन्त्र कमजोर छ हो ?
– हामीले अरु दललाई प्रजातान्त्रिक बन्न सिकायौं तर दुर्भाग्यको कुरा कम्युनिष्टहरुमा भन्दा पनि हामीकहाँ आन्तरिक लोकतन्त्र कमजोर छ त्यो म स्विकार गर्छु । पार्टीको नेतृत्वमा शेरबहादुर देउवा आएपछि आन्तरिक लोकतन्त्र बलियो हुँदै जान थालेको महसुस भएको छ ।
प्रतिक्रिया