सरकार कुन दलले चलाएको छ, कुन मन्त्रालयमा कुन दलका मन्त्री छन् भन्ने सवाललाई नेपालको कर्मचारीतन्त्र तथा आमतप्काले समेत विशेष महत्व दिने गर्छन् । सरकार तथा मन्त्रीहरूले समग्र मुलुकका लागि भन्दा पनि दल, समूह वा व्यक्तिकेन्द्रित व्यवहार गर्ने गरेका कारण यस्तो सोच विकास हुनु अनौठो पनि होइन ।
यस्तै सोच–संस्कारबाट मुक्त हुन नसकेका स्वास्थ्य मन्त्रालयका कर्मचारीबीच मन्त्री गगन थापाका क्रियाकलाप तथा कार्यशैली विषद् चर्चाको विषय बन्ने गरेको बुझिएको छ । थापा स्वास्थ्यमन्त्री बनेर आउँदा सुरुमा हौसिएका काङ्ग्रेसनिकट कर्मचारी यतिबेला खिस्रिक्क परेका छन् । सम्बद्ध स्रोतका अनुसार गगन मन्त्री भएपछि सबैभन्दा बढी काङ्ग्रेसमा आस्था राख्ने कर्मचारीले नै दुःख पाएका छन् । मन्त्रालयमा निष्ठावान कर्मचारीका रूपमा चिनिएका डा. भीम आचार्यलाई महानिर्देशक बनाउनुपर्नेमा सबैको एकमत थियो । तर, डा. राजेन्द्र पन्तले कृष्ण सिटौला र डा. अञ्जना केसीलाई प्रभावमा पारेपछि डा. भीमलाई पाखा लगाइएको कर्मचारीबीच चर्चा चल्ने गरेको छ ।
बताइएअनुसार राजेन्द्र पन्त तिनै हुन् जसले रामजनम चौधरीलाई नजराना बुझाएर बालस्वास्थ्य महाशाखामा प्रवेश गरेका थिए । कुनै बेला मन्त्रालयको खर्चमा धेरै विदेश भ्रमण गरेको भनेर स्वयम् गगनले सार्वजनिक कार्यक्रममै आलोचना गरे पनि उनी कृष्ण सिटौला र आफ्नी पत्नीको वचन मान्न बाध्य भए । यतिबेला बालस्वास्थ्य महाशाखामा डा. विकास लामिछानेलाई ल्याइएको छ । खगराज अधिकारी स्वास्थ्यमन्त्री हुँदा नजराना चढाएर राष्ट्रिय क्षयरोग केन्द्रका निर्देशक भएका पात्र हुन् तिनी । यस्तै, व्यवस्थापन महाशाखामा डा. विकास देवकोटालाई ल्याइएको छ । डा. देवकोटा मेडिकल सुपरिटेन्डेन्ट हुन् । अहिले मन्त्रालयमा यही समूहका भोलाराम छन् भने विभागमा देवकोटा । डा. लामिछाने र डा. देवकोटाको फाइल सदर हुन एक हप्ताभन्दा बढी समय लाग्यो । पन्तकै समयमा उठेको फाइल रकमको सुनिश्चितता नहुँदासम्म सदर भएन । यी दुवैको रकम विष्णु लामिछानेमार्फत सैलेश सिटौलादेखि कृष्ण सिटौलासम्म पुगेको बताइन्छ ।
गगन थापाले स्वास्थ्य संस्था पाँच बजेसम्म खुला राख्न निर्देशन दिए, तर व्यवस्थापन गर्न सकेनन् । पाँच बजेसम्म ओपीडी सेवा चलाउन चिकित्सकहरू सहमत छैनन् । अत्यावश्यक औषधिको अभाव सबैतिर छ । गगनले अस्पताल विकास समितिको अध्यक्ष पदाधिकारी नियुक्त गर्दा सिटौला समूहलाई मात्र गरे, अरू इमानदार क्षमतावान काङ्ग्रेसलाई पाखा लगाए । मन्त्रालयको कर्मचारी प्रशासन महाशाखादेखि स्वास्थ्य सेवा विभागको कर्मचारी प्रशासन शाखामा सबै एमालेसमर्थक कर्मचारीको एकलौटी रजाइँ छ, तर गगन थापा चुप छन् । केपी ओलीसमर्थक सचिवले असहयोग गर्दा पनि उनी चुप रहनुको रहस्य कर्मचारीहरू खोजिरहेका छन् । सैलेश सिटौला, राजु थापालगायतका गगनका पीएहरूले काङ्ग्रेस आस्थाका कर्मचारीलाई दुुःख दिने काम गरेका छन् । डा. राजेन्द्र पन्तले पनि वामपन्थीलाई फाइदा हुने निर्णय गर्न थालेका छन् । डोटीमा रिक्त हेअ पदमा नेपाल स्वास्थ्यकर्मी सङ्घका इमानदार उत्तम उपाध्यायलाई सरुवा गर्न गरेको अनुरोध नमानेर डा. पन्त र तारा लुइँटेलले रकम लिएर नयाँ शक्ति पार्टीका विष्णु जोशीलाई पठाएका छन् । यसरी युवा नेता गगन थापाको मन्त्रालयमा काङ्ग्रेससमर्थक कर्मचारी, स्वास्थ्यकर्मी, चिकित्सक तथा नर्सहरू निराश बन्न पुगेका छन् ।
प्रतिक्रिया