अनेकौँ सङ्घर्षबाट लखतरान हुँदै गर्दा एक दिन चुपचाप सिनामंगलको सुकुम्बासी टोलमा झुपडी बनाएर बस्ने निर्णयमा समेत उनी पुगेकी थिइन् । तर, आफूभित्रको कलाको कलहले त्यहाँबाट फेरि बागबजारतिरै फर्किन् ।
हरेक गीत–सङ्गीतमा आ–आफ्नो पन हुन्छ । भावना पोख्ने र गाउने अलग–अलग तौरतरिका भए पनि गीत–सङ्गीतले दिने सन्देश र आनन्द भने फरक–फरक स्वादको हुन सक्छ । चर्चित गायिका मनु नेम्वाङले हालै सार्वजनिक गरेको ‘रातमा फुल्ने जुनेली भुइँमा झर्दैन’ बोलको गीतलाई पनि यही कोणबाट हेर्न सकिन्छ । राजकुमार तेयुङको शब्द रहेको उक्त गीतलाई इन्द्रसुशील चोङवाङले लयबद्ध गरेका छन् । पूर्वेली लयमा बनेको यस पृथक शैलीको गीतलाई मनु नेम्वाङ, इन्द्रसुशील र टीका लिम्बूले गाएका छन् । चन्द्र बाम्बुलेद्वारा निर्देशित तथा सम्पादित यस गीतको म्युजिक भिडियोलाई ‘एभरेष्ट कल्चरल मिडिया’ लगनखेलबाट उत्पादन तथा वितरण गरिएको छ ।
लिम्बू भाषाका गीतसङ्गीत र संस्कृति संवद्र्धनमा लागिपरिरहेकी गायिका मनुले करिब १२ सयजति गीत गाइसकेकी छिन् भने स्विजरल्यान्ड, मलेसिया, हङकङ, कोरिया आदि देशमा उनको साङ्गीतिक यात्रा सम्पन्न भएको छ । उनका ‘घाँसे पोखरीमा सयौँ चोट सहेर,’ लिम्बू भाषामा गाइएको ‘तु तु गेन यम्बा’, बेसी गाउँतिर को झ¥यो, ‘कोइला खानीमा’ आदि गीत एक समय निकै चर्चित थिए । पाँचथरको दुर्गम गाउँ नवमीडाँडाको सुर्केमा जन्मिएकी गायिकाले लोक तथा आधुनिक गीतका गीति क्यासेट सयौँ चोट सहेर, लैजाऊ रेलैमा, लिम्बू भाषाको पाःमाः एल्बम श्रोतामाझ पस्किसकेकी छन् ।
अत्यन्त गरिब परिवारमा जन्मिएकी मनुले घाँस–दाउरा, मेलापात र हाट–बजारहरूमा हाक्पारे ख्याली, धाननाचसँगै पालाम गाएर आफ्नो सङ्गीतको गोरेटो खनेकी थिइन् । हिजो आफ्ना आवाज बिनासर्त बिनाउद्देश्य भीरपाखालाई मात्र सुनाइरहेकी मनु आज नेपाली एवम् लिम्बू संस्कृति तथा सङ्गीतको जगेर्ना गर्न लागिपरिरहेकी सच्चा सांस्कृतिक सहयात्री बनेकी छिन् ।
जीवनका अनगिन्ती ठक्कर र समस्यालाई पन्साउँदै उनी काठमाडौं पुगिन् र जीवनलाई सहज बनाउन हरेक सङ्घर्ष गर्दै छिन् । अनेकौँ सङ्घर्षबाट लखतरान हुँदै गर्दा एकदिन चुपचाप सिनामंगलको सुकुम्बासी टोलमा झुपडी बनाएर बस्ने निर्णयमा समेत उनी पुगेकी थिइन् । तर, आफूभित्रको कलाको कलहले त्यहाँबाट फेरि बागबजारतिरै फर्किन् ।
यसरी विभिन्न दुःख–सुख गर्दै औपचारिक सङ्गीत शिक्षा आरम्भ गरी आज आफ्नै रेकर्डिङ स्टुडियो एभरेष्ट कल्चरल मिडिया स्थापना गर्नेसम्मको सफलता मनुलाई मिलेको छ । एउटा दुर्गम गाउँमा जन्मेकी साधारण नारीको यो सङ्घर्ष र प्रगति सामान्य मान्न पक्कै सकिँदैन ।
– रोशन मेवाहाङ (लण्डन)
प्रतिक्रिया