चीनबाट तात्कालिक प्रधानमन्त्री केपी शर्मा ओलीले भन्दा धेरै ‘कोसेली’ लिएर आउने सपना देखेका प्रधानमन्त्री प्रचण्ड चीनको भ्रमण सुरु नहुँदै जिल्लिएका छन् । प्रचण्डको विश्वसनीयतामाथि शङ्का भएको नबताए पनि विश्वासको सङ्कटकै कारण चीनले प्रचण्डसँग कुनै प्रकारको सहमति र सम्झौता गर्न नचाहेपछि प्रचण्ड जिल्लिने स्थिति बनेको हो । प्रचण्डको भ्रमणलाई सामान्य औपचारिकतामा सीमित राख्न खोजिएको भए पनि चिनियाँ राष्ट्रपति सी जिनपिङले उनलाई पन्ध्र मिनेट लामो ‘दर्शनभेट’ भने दिने भएका छन् । प्रचण्ड र सीबीच चैत १३ गते भेटघाट हुने भएको छ ।

काठमाडौंबाट सोझै बेइजिङ जान चाहेका प्रचण्डलाई त्यस्तो अवसर पनि मिल्न सकेन । चैत १० गते उनी काठमाडौंबाट कुनमिङतर्फ प्रस्थान गर्ने र ११ गते हेनानको बोआओ सम्मेलनमा भाग लिन जानेछन् । १२ गते सम्मेलनलाई सम्बोधन गरेपछि प्रचण्ड सोही साँझ बेइजिङ पुग्ने र १३ गते राष्ट्रपति सीसँगको भेटपछि उनले चिनियाँ उद्यमी–व्यवसायीहरूद्वारा आयोजित एक कार्यक्रमलाई सम्बोधन गर्ने भएका छन् । १३ गते बेइजिङबाट छेङ्दु पुगेपछि उनी दुई दिन त्यहीँ बस्ने र १५ गते ल्हासा जाने कार्यक्रम तय भएको छ । १६ चैतमा प्रचण्ड ‘रित्तो हात’ काठमाडौं फर्कने निश्चित भएको छ ।

एक समय चीनले निकै विश्वास गरेका प्रचण्डले आफ्नै बोली र व्यवहारका कारण चीनको विश्वास गुमाएका हुन् । उनीसँगको संवाद, छलफल र सहमतिको कुनै अर्थ नरहने ठानेर नै चीनले भ्रमणप्रति न्यून रुचि राखेको बुझिन्छ । तथापि ‘वन बेल्ट वन रोड’को चिनियाँ अवधारणाबारे भने केही सहमति हुन सक्ने बुझिएको छ ।