क्यान्सर देखिएको सेललाई सेकेर मार्ने (रेडिएसनमार्फत किल)का लागि पछिल्लोपटक विकसित प्रविधि टोमो थेरापी उपकरण वीर अस्पतालले अवलम्वन गर्न लागेको छ । टोमो थेरापीको माध्यमबाट क्यान्सरका बिरामीको उपचार गर्ने तयारीमा मुलुककै जेठो अस्पताल जुटेको र छिट्टै यस्तो सेवा वीरमा उपलब्ध हुने अस्पतालका निर्देशक प्रा.डा. भूपेन्द्र बस्नेतले जानकारी दिनुभयो । हाल यस्तो सेवा निजीस्तरका केही अस्पतालमा मात्र उपलब्ध हुनाले बिरामीले चर्को मूल्य ब्यहोर्नु परेको छ । निजी अस्पतालहरुले दुई लाखसम्म असुल्दै आएको सोही सेवा लिन बीरमा जम्मा पाँचदेखि दश हजार बुझए पुग्ने दाबी गरिएको छ ।

‘टोमो थेरापी सेवा हामी रु पाँच हजारदेखि रु दश हजारसम्ममा दिने तयारीमा छौँ, यसमा अति विपन्न, असहाय, गरिब बिरामीलाई भने निःशुल्क सेवा प्रदान गर्दैछौँ’ – निर्देशक बस्नेतको भनाई छ । बताइएअनुसार स्वास्थ्य मन्त्रालयले यही आर्थिक वर्षमा उपकरण खरिद गरी सेवा सञ्चालनमा ल्याउन अस्पताललाई ४० करोड विनियोजन गरेको थियो । अस्पताल र अमेरिकाको एक्युरे कम्पनीबीच सो उपकरण खरिदका लागि सम्झौतासमेत भइसकेको छ । अस्पतालले उपकरण खरिद गर्न एलसी खोल्ने तयारीमा जुटेको छ ।

क्यान्सरका बिरामीको उपचारका लागि प्रयोग हुँदै आएका कोवाल्ट र लिन ज्याक उपकरणभन्दा टोमो थेरापी सेवा अत्याधुनिक र नयाँ प्रविधि मानिन्छ । विगतमा वीर अस्पतालले ती दुवै प्रविधिद्वारा सेवा दिँदै आएकामा विगत केही वर्षदेखि दुवै उपकरण बिग्रिएर थन्किएका छन् । हाल नयाँ र अन्यन्त्रबाट सिफारिस भइ आएका गरी दैनिक ५०-६० जना क्यान्सरका बिरामी बीर अस्पताल पुग्ने गर्छन् । जबकि, उपकरणको अभाव दर्शाउँदै बिरामीलाई निजी अस्पताल जान सिफारिस गर्ने प्रवृत्ति हुर्किएको छ । विपन्न बिरामीका लागि यो नै मृत्युसरह हुँदै आएको छ ।

नयाँ उपकरण जडान भइसकेपछि बीर अस्पतालले क्यान्सर उपचारका लागि अस्पतालमा आएजति सबै बिरामीलाई सेवा दिने तयारी गरेको छ भने विपन्न, असहाय क्यान्सर रोगीका बिरामीलाई सस्तो, सुलभ तथा अति विपन्नलाई निःशुल्कसमेत सेवा दिने र वीर अस्पतालले क्यान्सर उपचारमा अन्तर्राष्ट्रिय सेवा दिन सक्षम छ भन्ने सन्देश सेवाको सुरुवातसँगै सम्प्रेषण गर्ने अस्पतालको दाबी छ ।