कवि, लोकगीतकार तथा न्याउला गायक लालबहादुर खत्री दाहालद्वारा रचित ‘सौराई लागी राइसुवाकी’ नामक न्याउला काव्य–कृति प्रकाशनमा आएको छ । कर्णाली प्रदेशको लोकभाकामा आधारित ‘सौराई लागी राइसुवाकी’ कर्णाली क्षेत्रको भाषामा लेखिएका अत्यन्त सरसपूर्ण कविता (गीत) समेटिएको कृति हो । विपना खण्ड, भावना खण्ड, सपना खण्ड र विवेक खण्ड भनेर चारवटा खण्डमा कवि लालबहादुरका १ सय ७० वटा उत्कृष्ट सिर्जना यस कृतिमा समेटिएका छन् ।

खुट्टो टेक्न्या जग्गा छैन, घडेरी काँ खारु
गोठौन हल गोरु छैन कैका बल्ल नारु ।
क्याकीलाई छाउपडी बस्नु क्याकीलाई छुइ बारु
स्वर्गका बँगैचाभित्र आत्माका फूल झारु ।

०००

मार्सी धान फलाउने ठाउँनो कोदो बोयाका छन्
फापर कोदो खान नपाई गरिब रोयाका छन्

०००

ब्याँसाझैं कन्याउनै पस्न्याँ नेपाली मनभित्र
फिरङ्गी संस्कृति छाड्न्याँ भत्काई जीवन चित्र ।

०००

कर्कलाको पानीजस्तो जिन्दगीलाई पाउँछन्
जीवनको अर्थ खोज्न ठौर ठौर धाउँछन् ।
विश्वास मान्दा संसारको सधैं धोका खान्छन्
पदपैसा, मानसम्मान पाउन सेवा अर्न जान्छन् ।

०००

भिखारीको भीख हाल्न्याँ झोला जस्तो जीवन
हिमचुलीको सेतो हिउँ होला जस्तो जीवन ।

०००

माया अर्या पापी भन्न्याँ नअर्या घमण्डी
नभयै हजारी फूल देवी उग्रचण्डी ।

उपरोक्त काव्य–पङ्क्तिहरू ‘सौराई लागी राइसुवाकी’भित्रका प्रतिनिधिमूलक सिर्जना हुन्, जसले साहित्यप्रेमी पाठकलाई मन्त्रमुग्ध तुल्याउँछ । ३ सय १२ पृष्ठमा फैलिएको यस महत्वपूर्ण कृतिलाई मध्यपश्चिमाञ्चल साहित्य परिषद् (काठमाडौं)ले प्रकाशित गरेको हो । लोक भाका, लोक विश्वास, लोक व्यवहारका आधारमा आफ्ना अनुभूतिलाई प्रतिष्ठित तुल्याउने र तिनलाई मुद्रित रूपमा सुरक्षित राख्ने अभीष्टका साथ प्रकाशनमा आएको लालबहादुर खत्री दाहालको यस कृतिले नेपाली साहित्याकाशमा अहम् स्थान राख्ने विश्वास गर्न सकिन्छ । जम्मा तीन सय रूपैयाँ मूल्य रहेको ‘सौराई लागी राइसुवाकी’ एउटा सङ्ग्रहणीय कृति हो भन्नेमा कुनै सन्देह राखिरहन पर्दैन ।