पछिल्लो समय स्वाथ्य क्षेत्र अस्तव्यस्त बनिरहेको गुनासोहरु आइरहेको बेला राजधानीमा संचालित दर्जनौं क्लिनिकहरु गैर कानुनी रुपमा संचालनमा आएको पाइएको छ ।

आपूर्ति व्यवस्थापन तथा उपभोक्ता हित संरक्षण विभागले केही दिन देखि गरिरहेको बजार अनुगमनमा दर्जनौं क्लिनिकहरु गैरकानुनी रुपमा संचालनमा आएको भेटिएको हो । विभागले गरिरहेको अनुगमनको नतिजा हेर्दा बजारमा बेथितीले सिमा नाघेको प्रष्ट हुन्छ ।

थापाथलिमा भएको अनुगमनमा सो ठाउँमा संचालित दर्जनौं क्लिनिकहरू गैरकानुनी रूपमा चलेको पाइएको छ भने क्लिनिकमा प्रयोग हुने विल समेत नक्कली हुने गरेको फेला पारेको छ ।

विभागले एकैदिनमा काठमाडौ पोलिक्लिनिक एण्ड प्याथोलोजि ल्याब प्रा.लि थापाथलीमा अनुगमन गर्दा जिल्ला जन स्वास्थ्य कार्यालयबाट स्वीकृति नलिई संचालन गरेकोले सिलबन्दी गरेको छ ।

त्यस्तै, रिजन फार्मेसी थापाथली प्यान दर्ताको सक्कल कागजात र फ्यास बोर्डमा लेखिएको सेवा सुविधाहरूको स्वीकृत नलिएकोले सो हटाइ ३ दिन भित्र फोटो सहित यस विभागमा पेश गर्न निर्देशन दिएको छ, त्यस्तै वेटर लाइफ फार्मेसी, थापाथलीले डि.डी.ए.को फर्मयाट अनुसारको बिल छपाइ नगरेको भन्दै तीनदिनभित्रै विभागमा उपस्थित हुन भनेको छ ।

यस्तै, हामा यू.एस. जी एण्ड क्लिनिक, थापाथली जिल्ला जन स्वास्थ्य कार्यालयबाट स्वीकृती नलिइ संचालन गरेको भेटिएको छ । यस्तै, हारती फर्मा, नारायणयी फर्मा औषधि पसलले डि.डी.ए.को फर्मयाट अनुसारको बिल छपाइ नगरेको पाइएको छ ।

त्यस्तै, डेन्टल डायग्नोसिष्ट प्रा.लि, माता हारती प्याथोलोजि ल्याबमा अनुगमन गर्दा कार्यरत कर्मचारीहरूको सम्झौतापत्र नभएको, डेन्टल ओ.पि.डी. र एक्सरे लिएकोमा हाल एक्सरे मात्र भएको पाएको थियो ।

त्यस्तै, रश्मी पोलिक्लिनिक एण्ड प्याथोलोजि ल्याब प्रा.लिमा अनुगमन गर्दा ल्याब सेवा र यू.एस.जि. सेवा सम्बन्धि कागजातहरू नभएको पाएको थियो भने विपुल फार्मेसीमा अनुगमन गर्दा डि.डी.ए. को फर्म्याट अनुसारको बिल नभएको र सम्बन्धित व्यवसायी अनुपस्थित रहेको पाएको थियो ।

यसरी राजधानीका क्लिनीकहरूमा अनुगमन गर्दा खराबी भेटिने क्रम बढेको विभागको भनाई छ । यो एकदिनको अनुगमनको नतिजाले हेर्दा पछिल्लो समय स्वाथ्य क्षेत्रमा बेथितीले सिमा नाघेको प्रष्ट हुन्छ ।
विभागका प्रवक्ता लक्ष्मण श्रेष्ठले पछिल्लो समय बजार अनुगमनलाई तीव्रता दिएको बताउँदै कौफियत देखिएकाहरूलाई कानुनी दायरामा ल्याइएको जिकिर गरे ।

उनले बजार नियन्त्रण बाहिर गएको स्वीकादै यसलाई नियन्त्रणमा ल्याउन सिमत स्रोत साधानका बिच पनि आफूहरू लागिपरेको स्पष्ट पारे । यसरी विभागले गरिरहेको अनुगमनमा कैफियत भेटिएकालाई सुध्रन मौका दिइएको छ भने बारम्बार अटेर गर्नेहरुलाई विभागले मुद्दा चलाउने तयारी गरेको बुझिन्छ ।