पाँचौँ एसियन इण्डोर तथा मार्शल आर्टस् गेम्सको SOLEMN समारोहमा सहभागिता जनाउन मंलगबार (२४ साउन) सर्वोच्चद्वारा अवैधानिक घोषित नेपाल ओलम्पिक कमिटीका अध्यक्ष जीवनराम श्रेष्ठ र महासचिव लामा टेण्डी शेर्पा त्यसतर्फ प्रस्थान गर्दा त्रिभुवन अन्तर्राष्ट्रिय विमानस्थलमा लामाको खोजतलाज गरिएको समाचार प्राप्त भएको छ । प्राप्त जानकारीका अनुसार विमानास्थलका कर्मचारीले लामाको नाम लाउडस्पिकरवाट सम्वोधन गर्दै सम्बन्धित निकायमा सम्पर्क गर्न भनेपछि यात्रुहरुमा खैलाबैला मच्चिएको थियो ।
अध्यक्ष श्रेष्ठ र महासचिव लामा तुर्कमिनिस्तानको आस्गाबात शहरमा अगस्ट १७ तारिखका आयोजना हुन गैरहेको कार्यक्रममा सहभागिता जनाउन त्यसतर्फ जान लागेका थिए । उक्त कार्यक्रममा एशियाली राष्ट्रका ओलम्पिक कमिटीका अध्यक्ष तथा महासचिवलाई निमन्त्रणा गरिएको बुझिएको छ ।
तर, विमानस्थलका कर्मचारीले अध्यक्ष श्रेष्ठप्रति रत्तिभर ध्यान नदिनु तर लामालाई चाहिँ लाउडस्पिकरमार्फत सम्पर्क गर्न आग्रह गरिएको विषय यतिबेला खेलकुदमा चर्चाको विषय बनेको छ । आखिर किन लामालाई मात्र माइकिङ गरेर बोलाइयो त ? प्रश्न उठ्नु स्वभाविक छ ।
प्राप्त जानकारीका अनुसार यसअघि लामा सुन तस्करीको आरोपमा प्रहरी हिरासतमा परेका र पछि धरौटीमा छुटेको हुनाले यसबारे सोधपुछ गर्न उनलाई विमानस्थलका कर्मचारीले सम्पर्कमा बोलाएका अनुमान गरिएको छ । ज्ञात रहोस्, लामाको उक्त मुद्दा अहिलेसम्म किनारा लागेको छैन ।
सोही विषयमा कसैले लामाविरुद्ध उजुरी हालेका कारण विमानस्थलका कर्मचारीले खोजतलास गरेको स्रोतले वताएको छ । लामाको खोजतलास र सम्पर्कसँगै के कुरा भयो त्यसको खुलासा नभए पनि एकजना वरिष्ठ नेताले विमानास्थलका कर्मचारीलाई फोन गरेका स्रोतले बताएको छ । त्यसपछि सामान्य सोधपुछपछि लामालाई विदेश यात्राको लागि अनुमति दिइएको थियो । लामालाई राष्ट्रिय खेलकुद परिषदकोे उपाध्यक्ष, नेपाल ओलम्पिक कमिटीको महासचिव, नेपाल बास्केट बल संघको अध्यक्षको हैसियतमा विमानस्थलका कर्मचारीले नरोकेको पनि स्रोतले दाबी गरेको छ ।
प्रतिक्रिया