कम्पनीको ३० करोड रुपैयाँ धरौटी जफत

नेपाल विद्युत् प्राधिकरणले चिनियाँ कम्पनी सेन्ट्रल चाइना पावर ग्रीड (सीसीपीजी) संगको ठेक्का सम्झौता रद्ध गरेको छ । सो कम्पनीले ढल्केबर प्रसारण लाईन निर्माणको ठेक्का सम्झौता अनुसार काम नगरेको र पटकपटक निमार्ण कार्य सम्पन्न गर्न दिएको निर्देशन समेत अटेर गरेर बसेपछि प्राधिकरणले सम्झौता रद्ध गरेको हो ।

ढल्केबरमा निर्माणाधीन २ सय २० केभी सबस्टेसन चाडै निर्माण गर्न पटक पटक आग्रह गर्दा ठेकेदार कम्पनीले अटेर गरेपछि सम्झौता नै तोड्नु परेको प्राधिकरणका प्रवक्ता प्रवल अधिकारीले बताएका छन् । प्राधिकरणसँग भएको सम्झौता अनुसार चिनियाँ कम्पनीले ढल्केबर, इनरुवा र हेटौंडाको सबस्टेसन निर्माण गर्नुपर्ने रहेको थियो ।

अहिलेसम्म सीसीपीजीले ढल्केबर सबस्टेशनकोे ८८ प्रतिशत काम मात्रै सकेको सहप्रबक्ता अधिकारीको भनाई रहेको छ । सो कम्पनीसँग केही समयअघि प्रसारणलाई निर्माणको सम्झौता तोडेसँगै सवस्टेशन पनि निर्माणगर्न अटेर गर्दै आएकाले बाध्यतावस उक्त सम्झौता तोडिएको अधिकारीले जानकारी दिए । ती सवस्टेशनको काम ठेकेदार कम्पनीले २ बर्ष अघि नै सक्नुपर्ने भएपनि हालसम्म एउटा सवस्टेशनको काम पनि पुरा गर्न नसेकेको प्राधिकरणले जानकारी दिएको छ ।

प्राधिकरणका अनुसार ठेक्का तोडिएसँगै ठेकेदार कम्पनीको ३० करोड रुपैयाँ बराबरको धरौटी समेत जफत भएको छ । प्राधिकरणले कुल २ अर्ब २ करोड रुपैयाँमा सवस्टेशन निर्णाणका लागि ठेक्का दिएको थियो । हिउँदमा विद्युत आयातमा समस्या विद्युत प्राधिकरणले यस पटकको हिउँदमा ढल्केबर मोजफपुर प्रशासणलाईनबाट २ सय मेगावाट विद्युत आयात गर्ने सम्झौता गरेको थियो ।

सवस्टेशन निर्माणको ठेक्का तोडिएसँगै भारतबाट उक्त विजुली ल्याउन नसकिने उनले जानकारी दिए । हाल सो प्रशारणलाईनबाट १ सय ४५ मेवा विजुली आयात भइरहेको र हिउँदमा पनि सोही परिणाममा मात्र ल्याउने सकिने उनले बताए । जसले गर्दा हिउँदको समयमा विद्युत व्यवस्थापन गर्न केही कठिनाई हुने समेत उनको तर्क थियो । त्यसको क्षतिपूर्ति बापत अन्य प्रशारणलाईनबाट ल्याउने तयारी गरिएको समेत प्राधिकरणले जानकारी दिएको छ ।