शेरबहादुर देउवाकी पत्नीसमेत रहेकी नेपाली काङ्ग्रेसकी नेतृ डा. आरजु राणा यसपटक प्रत्यक्षतर्फ प्रतिनिधिसभाको उम्मेदवार बन्ने भएकी छिन् । उनको लागि सबैभन्दा सुरक्षित क्षेत्र खोजी गर्दा कैलालीको ५ नम्बर निर्वाचन क्षेत्र उपयुक्त ठानिएको छ । यसअघि समानुपातिकतर्फ सांसद रहेकी आरजुले काङ्ग्रेस पार्टीमा दोस्रो–तेस्रो तहका नेताबाट पार्टी र देश चल्न नसक्ने देखेपछि प्रत्यक्षतर्फ निर्वाचन लडेर ‘नेता’ बन्ने निर्णय लिएको बताइन्छ । देउवापछि काङ्ग्रेस ‘हाँक्न’ सक्ने नेताको अभाव पूर्ति गर्न आरजु अघि बढ्नुपरेको उनका निकटवर्तीहरूको भनाइ छ ।
यसअघि आरजु राणा बर्दियाबाट चुनाव लड्ने भएकी थिइन् । बर्दियाका काङ्ग्रेस सभापतिलाई उनले आफ्नो विश्वासमा लिइसकेकी थिइन् भने राप्रपाबाट बर्दियामा चुनाव लड्दै आएकी आफ्नी माता प्रतिभा राणालाई जापानको लागि राजदूत बनाएर ‘ठाउँ सुरक्षित गरेकी’ थिइन् । तर, निर्वाचन क्षेत्र निर्धारण आयोगका सदस्यले आरजु र शेरबहादुर देउवाको इच्छा पूरा नगरिदिएपछि आरजु विकल्प खोज्न बाध्य भएकी हुन् । देउवा र उनकी पत्नीको इच्छा थियो– ‘बर्दियामा कम्तीमा तीनवटा निर्वाचन क्षेत्र बनोस् ।’ दुईवटा मात्र निर्वाचन क्षेत्र हुँदा स्थानीय नेताहरूलाई सन्तुलन र विश्वासमा राख्न मुस्किल पर्ने तथा ठूला निर्वाचन क्षेत्रमा दौडधुप गर्दा नेतृ आरजु राणालाई कष्ट हुने भएकोले तीनवटा निर्वाचन क्षेत्र बनाउन प्रधानमन्त्री देउवा र नेतृ राणाले आयोगका केही सदस्यहरूलाई पटक–पटक दबाब दिएका थिए । तर, आयोगका सदस्यहरू पद छोड्न तयार भए, बर्दियामा तीन निर्वाचन क्षेत्र बनाउन तयार भएनन् । त्यसैले कैलाली ५ नम्बर क्षेत्रलाई आफ्नो बनाउन आरजु राणाले निकै कोसिस गरेकी छिन् ।
त्यस क्षेत्रका नेता पुष्करनाथ ओझालाई चार नम्बर क्षेत्रमा उम्मेदवार बनाउने तयारी भएको छ । यद्यपि पुष्करसहित त्यहाँका स्थानीय नेताहरू असन्तुष्ट बन्न पुगेका छन् । अब जोसुकै व्यक्ति असन्तुष्ट भए पनि कैलाली ५ मा आरजु उम्मेदवार बन्ने निश्चित भइसकेको छ । त्यस क्षेत्रको थारू भोट आफ्नो बनाउन विजय गच्छदारलाई पार्टीमा समेटिएको मात्र छैन, ५ मध्ये दुई निर्वाचन क्षेत्रमा गच्छदारकै सिफारिसका मानिसलाई टिकट दिइने भएको छ । तर, त्यस क्षेत्रका लोकप्रिय व्यक्ति गोपी हमाल काङ्ग्रेसबाट बाहिरिएको र उनलाई विवेकशील–साझा नामक पार्टीले उम्मेदवार बनाउने सम्भावना भएकोले त्यसलाई रोक्न विभिन्न प्रयास भइरहेको बताइन्छ ।
प्रतिक्रिया