नेपाल लोकतान्त्रिक फोरम नेपाली कांग्रेसमा विलय भएपछि उक्त पार्टीका सहमहामन्त्री मुस्तक आलम नेकपा एमालेमा प्रवेश गरेका छन् । एमाले अध्यक्ष केपी शर्मा ओलीले आइतबार उनलाई पार्टीमा प्रवेश गराउदै स्वागत गरेका हुन् ।

अध्यक्ष विजयकुमार गच्छदारले पार्टी कांग्रेसलाई बुझाएकोले आफू एमालेमा प्रवेश गरेको आलमले बताए । पुराना कांग्रेसी नेता शेख इद्रिसका नाति आलम आफ्ना मामा तथा कांग्रेसका नेता मोहमद अफताव आलमसँगको ‘शत्रुता’ का कारण एमाले प्रवेश गरेका हुन् । उनको मामा आलमसँग राम्रो सम्बन्ध छैन ।

गत संविधान सभा निर्वाचनमा उनी विजय गच्छदार नेतृत्वको मधेसी लोकतान्त्रिक फोरम प्रवेश गरेर आफ्ना मामाविरुद्ध रौतहट-२ बाट संविधान सभा सदस्यको चुनाव लडेका थिए ।

उनले अफताव आलमलाई उनकै निर्वाचन क्षेत्रमा हराएपछि मामा-भान्जाबीचको ‘शत्रुता’ झनै चर्किएको थियो । रौटहटमा शेख इद्रिसको राजनीतिक विरासत उनका भतिजा अफताव आलमले सम्हाल्ने कि उनका छोरीपट्टिका नातिले सम्हाल्ने भन्ने झगडा छ ।