गत स्थानिय निर्बाचनमा माओवादीसँग तालमेल गरी धोका खाएको एमाले लमजुङले माओवादी केन्द्रका जिल्ला नेताहरुलाई यो पटक धोका नदिन आग्रह गरेका छन् । माओवादी कै कारण स्थानिय तहको निर्बाचनमा केही समस्या पैदा भएको भन्दै एमाले लमजुङले जिम्मेवार बन्न माओवादी केन्द्रसँग यस्तो अनुरोध गरेको हो ।

जिल्लामा वाम गठबन्धनले मंसिर १० गते हुने प्रतिनिधि र प्रदेशसभा निर्बाचनमा बहुमतका साथ चुनाव जित्ने दावी गरेका छन् । वाम गठबन्धनकोतर्फबाट आयोजित संयुक्त पत्रकार भेटघाटमा एमाले र माओवादी केन्द्रका नेताहरुले गठबन्धन चुनावका लागि मात्रै नभएर एकीकरणका लागि भएको भन्दै आफूहरुलाई मतदाताले बहुमतका साथ विजयी गराउने दावी गरेका हुन् ।

प्रतिनिधिसभाका उम्मेदवार एवम माओवादी नेता देवप्रसाद गुरुङले अहिलेको आवश्यकता एउटै कम्युनिष्ट पार्टी भएको भन्दै देशमा स्वाधिनता र समृद्ध नेपाल निमार्ण गर्न बाम एकता भएको बताए । निर्वाचन सकिएपछि पार्टी एकता गरिने र निर्वाचनको नतिजाले नै एकताको वाटो तय गर्ने गुरुङको भनाई छ ।

यस्तै, नेकपा एमालेवाट प्रदेश सभा ‘ख’ का उम्मेदवार एवम केन्द्रीय सचिव पृथ्वीसुव्वा गुरुङले विचार, सिद्धान्त र गन्तव्य मिल्ने पार्टीहरुका बीचमा एकीकरण गरिएको बताए । ‘सुखी नेपाली र समृद्ध नेपाल’ बनाउनका लागि नेकपा एमाले र माओवादी केन्द्रविच सहकार्य गर्दै अघि बढ्ने प्रतिवद्धता व्यक्त गरे । आफू केन्द्रीय नेता भएको र सांसद बन्नकै निम्ति चुनावमा भाग लिन नपर्ने हुँदा हुँदै पनि प्रदेश नम्बर ४ र लमजुङको समृद्धिको लागि उम्मेदवारी दर्ता गराएको बताए ।

त्यस्तै, प्रदेश सभा सदस्यका लागि क्षेत्र नं. ‘क’ मा वाम गठबन्धनबाट नेकपा एमालेबाट उम्मेदवार बनेका एमाले जिल्ला अध्यक्ष धनन्ञ्जय दवाडीले आर्थिक समृद्धि र देशलाई दिर्घकालिन निकास दिन वाम गठबन्धनको विजय अनिवार्य रहेको बताए ।

प्रतिनिधि र प्रदेश सभा निर्वाचनका लागी चुनावी एकता गरेको नेकपा एमाले र नेकपा (माओवादी केन्द्र) लमजुङले संयुक्त रुपमा चुनावी प्रचार प्रसार अभियान गर्ने भएका छन् ।

स्थानिय तह निर्वाचनमा समेत चुनावी एकता गरेका दुई बामघटकले संयुक्त रुपमा चुनावी अभियान गरेका थिए । सोचेअनुरुपको नतिजा नआएको भन्दै अवको निर्वाचनमा पहिलाका कमि कमजोरीहरुलाई सच्याएर लमजुङमा बामगठबन्धनलाई विजयी गराउने प्रतिबद्धता समेत गरेका छन् ।