आगामी हिउँदको विद्युत् माग व्यवस्थापनका लागि नेपाल विद्युत् प्राधिकरणले टनकपुर नाका (भारत)बाट थप पाँच मेगावाट विद्युत् आयात गर्ने भएको छ । सो नाकाबाट ३५ मेगावाट विद्युत् आयात गर्दै आएकोमा यस हिउँदका लागि पाँच मेगावाट थपेर कूल ४० मेगावाट विद्युत् सो नाकाबाट आयात गर्न लागिएको प्राधिकरणले जनाएको छ ।
बताइएअनुसार विद्युत् आयातसम्बन्धी द्विपक्षीय सम्झौतामा प्राधिकरणका कार्यकारी निर्देशक कुलमान घिसिङ र भारतको पावर ट्रेड कर्पोरेशन (पिटिसि) इन्डियाका तर्फबाट डा. राजीवकुमार मिश्राबीच सहमतिपत्रमा हस्ताक्षर भएको छ । यही कात्तिक १५ बाट लागू भई आगामी जेठमा सकिने गरी सम्झौतामा हस्ताक्षर भएको हो ।
टनकपुर नाकाबाट ४० मेगावाटसम्म विद्युत् आयात हुँदा सुक्खा याममा सुदूरपश्चिमको माग व्यवस्थापन गर्न सहज हुने प्राधिकरणको भनाइ छ भने टनकपुरमै १०० एपभीएको ट्रान्सफर्मर राखेर थप ४० मेगावाट विद्युत् आयात गर्ने सम्बन्धमा छलफल गर्न प्राधिकरणको उच्च नेतृत्व आज शुक्रबार भारतको राजधानी नयाँ दिल्ली प्रस्थान गर्ने भएको छ ।
प्रतिक्रिया