नेपाल राष्ट्र बैंकले वैदेशिक रोजगार बचत पत्र जारी गर्ने तयारी थालेको छ । मंसिर १० गतेदेखि ५० करोड रुपैयाँ बराबरको बैदेशीक रोजगार बचत पत्र जारी गर्ने राष्ट्र बैंकको तयारी हो ।

बैदेशिक रोजगारीमा रहेका वा रोजगारीबाट नेपाल फर्किएको ४ महिना नपुगेका नेपाली तथा गैर आवासीय नेपाली एनआरएनले बचत पत्र किन्न सक्नेछ । उनीहरुका परिवारले समेत बचत पत्र किन्न पाउने ब्यवस्था रहेको राष्ट्र बैंकले जनाएको छ । यो बचत पत्रको बिक्री मंसिर २९ गतेसम्म चल्नेछ ।

बार्षिक १० प्रतिशत व्याजदर पाइने यस्तो बचत पत्रको व्याजमा कर समेत नलाग्ने व्यवस्था रहेको छ । ६–६ महिनाको दरमा व्याजदर पाइने यस्तो बचत पत्र बैंक तथा वित्तीय संस्थामा धितोमा राखेर कर्जा लिन पनि सकिनेछ । ५ वर्षसम्म बचत पत्रको अवधि कायम रहनेछ भने त्यसपछि खरिदकर्ताले साँवा फिर्ता पाउने छन् ।

बचत पत्र खरिद गर्दा कम्तिमा पाँच हजार रुपैयाँ र बढिमा पाँच हजारले भाग गर्न सकिने रकमको आधार लगानी गर्न सकिने व्यवस्था छ । नेपालमा सिटिजन्स, एनएमबी, नबिल, माछापुच्छ्रे्, प्रभु, सनराइज, सिद्धार्थ, सानिमा, सेञ्चुरी कमर्सियल बैंकमार्फत खरिद गर्न सकिन्छ ।

बैंकका अनुसार बाह्य देशहरु मलेशिया, कतार, कुवेत, युएइ, जापान, साउदी अरब, कोरिया, इराक, भारत, अमेरिका, दक्षिण कोरिया र इजरायलबाट पनि बचत पत्रमा लगानी गर्न सकिने व्यवस्था छ ।