चलचित्र विकास बोर्डकी नवनियुक्त अध्यक्ष निकिता पौडेलले कलाकारहरूको क्षमता विकासका लागि नयाँ कार्यक्रम अगाडि ल्याएकी छिन्। पौडेलले कलाकारको अभिनय क्षमता वृद्धिका लागि तालिमको व्यवस्था गर्ने भएकी छन् । भारतीय दुतावासको आयोजना तथा चलचित्र विकास बोर्डको सहकार्यमा भारतको पुणेमा नेपाली कलाकारका लागि बीस दिवसीय स्क्रिन अभिनयसम्बन्धी फाउन्डेसन कोर्स आयोजना हुने भएको हो ।

भारतीय फिल्म एवम् टेलिभिजन संस्थानमा हुने उक्त अभिनय कार्यशालामा सहभागी हुने कलाकारले भारतीय दुतावासबाट निर्धारण गरिएको दरखास्त फारम, एकप्रति फोटो, शैक्षिक योग्यताको प्रतिलिपि र अभिनयसम्बन्धी कागजपत्रहरु संकलन गरि विकास बोर्ड कार्यालयमा बुझाउनु पर्ने बताइएको छ । साथै, बोर्डको इमेलमार्फत पनि पठाउन सकिने छ । २०१८ जनवरी ३ सम्मलाई दरखास्तको लागि समय सीमा तोकिएको छ ।

२० दिने तालिम अंग्रेजी र हिन्दी भाषामा हुनेछ । दरखास्त बुझाउन चाहनेले कम्तिमा केहि नेपाली कथानक सिनेमा वा विज्ञापनमा अभिनय गरेको हुनैपर्ने क्राइटेरिया तोकिएको छ ।

बोर्डमा आएपछि निकिताको पहलमा हुन लागेको यस कार्यले चलचित्र क्षेत्रले नयाँ सोच तथा क्षमता भएका कलाकार तथा प्राविधिकहरू पाउने अपेक्षा जगाएको छ । ‘यो त शुरूवात मात्र हो । चलचित्र क्षेत्रको बिकासका लागि अन्य थुप्रै योजना छन्, म क्रमशः लाग्दै जाने छु,’ निकिताले भनिन् ।