देशका पेशागत एवम् व्यवसायिक सङ्घ–संस्थाहरू समेत पार्टीकरण भइरहेका बेला यातायात व्यवसायीहरू भने ‘एक’ भएर अगाडि बढ्ने भएका छन् । माघ १७, १८ र १९ गते हुने नेपाल यातायात व्यवसायी राष्ट्रिय महासङ्घको महाधिवेशनमा वामपन्थी र लोकतान्त्रिक पक्षले संयुक्त प्यानल बनाउने निर्णय गरेपछि एकताको स्थिति बनेको हो ।
एमाले नेता मुकुन्द न्यौपाने र माओवादी नेता लेखराज भट्टको विशेष उपस्थितिमा आज (पौष ३० गते) काठमाडौंमा सम्पन्न नेपाल लोकतान्त्रिक यातायात व्यवसायी सङ्गठन, गणतान्त्रिक यातायात व्यवसायी सङ्गठन, गणतान्त्रिक यातायात व्यवसायी सङ्घ र यातायात काङ्ग्रेसको संयुक्त बैठकले तीनवटै पक्षको साझा उम्मेदवारहरूको टुङ्गो लगाएको छ ।
निर्णयअनुसार महासङ्घको अध्यक्षमा डोलनाथ खनाल, वरिष्ठ उपाध्यक्षद्वयमा दीपक अधिकारी र भरत तिमिल्सिना, उपाध्यक्षहरूमा मीनबहादुर मानन्धर, जीतबहादुर भारती र शरद अधिकारी, मालवाहक उपाध्यक्षमा यादवलाल श्रेष्ठ, महासचिवमा पुण्यप्रसाद सिटौला (सरोज), उपमहासचिवद्वयमा देवनाथ गौतम र वसन्त भण्डारी, कोषाध्यक्षमा हेमेन्द्र शेरचन तथा सह–कोषाध्यक्षमा ज्ञानेन्द्र श्रेष्ठ, पर्यटकीय तर्फबाट वर्गीय संयोजक पुरुषोत्तम सिंखडालाई उम्मेदवार बनाइने भएको छ ।
श्रीप्रसाद मैनालीको अध्यक्षतामा भएको बैठकमा एमाले स्थायी कमिटी सदस्य मुकुन्द न्यौपाने प्रमुख अतिथि तथा माओवादी स्थायी कमिटी सदस्य लेखराज भट्ट विशिष्ट अतिथिका रूपमा सहभागी हुनुहुन्थ्यो ।
बैठकमा नेपाल लोकतान्त्रिक यातायात व्यवसायी सङ्गठनका पदाधिकारीहरू हेमेन्द्र शेरचन, देवनाथ गौतम, भरत तिमिल्सिना र केदार क्षेत्री, गणतान्त्रिक यातायात व्यवसायी सङ्घका दधिराम खरेल, डोलनाथ खनाल, पुण्यप्रसाद सिटौला (सरोज) र राजेन्द्र शर्मा तथा यातायात काङ्ग्रेसका तर्फबाट खगेश्वर बोहोरा, चोपनारायण श्रेष्ठ, शरद अधिकारी र पूर्णबहादुर केसीको सहभागिता थियो ।
वामपन्थी र लोकतान्त्रिक यातायात व्यवसायहिरूको एकताले सकारात्मक परिणाम हासिल गर्ने विश्वास सम्बद्ध पक्षले गरेका छन् ।
प्रतिक्रिया