प्रदेशसभा निर्वाचनमा मनाङ प्रदेश ‘ख’बाट निर्वाचित सांसद दीपक मनाङ्गे (राजीव गुरुङ) लाई सर्वोच्च अदालतले ५ बर्षको जेल सजाँए सुनाएपछि उनको सांसद पद धरापमा पर्ने भएको छ ।

बिहीबार एमालेले आयोजना गरेको पत्रकार भेटघाटमा एमाले अध्यक्ष ओलीले दीपक मनाङ्गेका विषयमा अलि फरक अभिब्यक्ति दिएका छन् । अध्यक्ष ओलीले दीपक मनाङ्गेको कुनै सरोकार नभएको बताएका छन् ।

शुरुमा स्वतन्त्र उम्मेदवारका रुपमा मनाङ ‘ख’ बाट उम्मेदवारी दिएका मनाङ्गेलाई पछि एमालेले साथ दिएको थियो । मनाङ्गेले पनि आफू एमाले सांसद भएको भन्दै हिंडेको बुझिएको छ । तर आफ्नै पार्टीको सांसद रहेका मनाङ्गेलाई अब के गर्नुहुन्छ ? भन्ने पत्रकारहरुको प्रश्नमा अध्यक्ष ओलीले ‘स्वतन्त्र सांसद, नाम के रे ?’ भन्दै जवाफ दिएका छन् । मनाङ्गेलाई के मुद्दा थियो र के फैसला ग¥यो आफूलाई थाहा नभएको भन्दै ओली टक्टकिएका थिए ।

यतिबेला एमालेबाट ललितपुर १ मा सांसद भएका पूर्वडीआईजी नवराज सिलवाल र दीपक मनाङ्गेको विषयमा एमालेभित्र टाउकोदुखाईको विषय बनेको छ । दुबैलाई अदालतले पक्राउ गर्न आदेश दिइसकेको छ । पत्रकार भेटघाटमा एमाले अध्यक्ष ओलीले दिएको अभिब्यक्तिमा सांसद सिलवाललाई काखा र मनाङ्गेलाई पाखा गरेको आभाष भएको छ । अध्यक्ष ओलीले आफू असुरक्षित रहेको सिलवालको वयान स्वाभाविक भएको बताए ।