हिमाली तथा उच्च पहाडी क्षेत्रमा प्रयोगमा आउने भोटे घोडा लोप हुन थालेपछि उदयपुरको कटारीस्थित कमलानदी त्रिवेणी मेलामा कारोबारकै चोला बदलिएको छ । भोटेघोडाको किनबेच नभएकाले यसपटक भोटे कुकुरको कारोबार बढेको पाइएको छ ।

यही माघ १ गतेदेखि सञ्चालन भई आज सम्पन्न हुन लागेको त्रिवेणी मेलामा अहिलेसम्म सबैभन्दा बढी भोटे कुकुरको किनबेच भएको मेला व्यवस्थापन समितिले जनाएको छ ।

समितिका अध्यक्ष नरबहादुर तामाङका अनुसार विगतका वर्षमा सोलुखुम्बु र ओखलढुंगाको रुम्जाटार क्षेत्रबाट झारिने भोटेघोडाको किनबेच धेरै हुने गरे पनि अहिले तिनको प्रयोग र प्रचलन घट्दै गएकाले मेलामा पनि भोटेघोडाको किनबेच ठप्प हुन पुगेको छ । अहिले सोलुखुम्बु र ओखलढुंगाबाट खरिद गरेर झारिएका भोटेकुकुर र तिनका छाउरासमेतको किनबेच बढेको हो ।

मेला व्यवस्थापन समितिका सदस्य केदार धमलाका अनुसार एउटा भोटे कुकुरको मूल्य आठदेखि १० हजारसम्म पुगेको छ भने छाउरा समेत तीन हजारसम्ममा बिक्री भइरहेका छन् । सोलुको हिमाली क्षेत्रबाट झारिएका भोटेकुकुर अहिले तराईको धनुषा, सप्तरी, सिरहा, महोत्तरीसहित भारतको बिहारसम्मका ग्राहकले किनेर लगेका छन् । माघको ३ गतेदेखि हालसम्ममा झण्डै चार लाखसम्मको भोटेकुकुरको कारोबार भएको व्यवस्थापन समितिले जनाएको छ ।

त्रिवेणी मेलामा हिमाली भोटेकुकुरको कारोबार ह्वात्तै बढेपछि हिमाली सोलु र ओखलढुंगा क्षेत्रबाट थुप्रै भोटेकुकुर मेलामा कारोबारका लागि ल्याउने कार्यसमेत भइरहेको छ । माघ १ गते देखि शुरु भएको पन्ध्र दिने मेलामा अहिलेसम्म झण्डै दुई करोडको कारोबार भइसकेको र सात लाखभन्दा बढीले त्रिवेणी धामको दर्शन गरेको बताइएको छ ।