दुई वाम पार्टीको एकीकरण प्रक्रिया अवरुद्ध बनेको विश्लेषण भइरहेको बेला नेकपा (माओवादी केन्द्र)का नेता तथा पूर्वगृहमन्त्री जनार्दन शर्मा (प्रभाकर)ले नेकपा (एमाले) र माओवादी केन्द्रबीच औपचारिकतामा बाहेक पार्टी एकता भइसकेको दाबी गरेका छन् । प्रेस सेन्टर प्रदेश नं. ६ सुर्खेतद्वारा आज सुर्खेतमा आयोजित कार्यक्रममा उनले अब एकता घोषणा हुन मात्र बाँकी रहेको दाबी गरेका हुन् ।

उनका अनुसार पछिल्ला दिनमा सकारात्मक छलफल भइरहेको छ, दुवै पार्टीका नेताहरुको कार्य विभाजन भएपछि एकताको मिति घोषणा हुनेछ । एकताबाट बन्ने पार्टीको अध्यक्षको विषयमा दुवै पार्टीका अध्यक्षबीच सकारात्मक छलफल भइरहेको जनाउँदै उनले एकता प्रक्रिया जनअनुमोदित भइसकेकाले यसमा कुनै शंका नगर्न आग्रह समेत गरे ।

भारतीय विदेशमन्त्री सुष्मा स्वराजको नेपाल भ्रमणले एकतामा खलल पुगेको अनुमान गर्नेहरुलाई लक्षित गर्दै प्रभाकरले स्वराजको भ्रमणले एकतामा कुनै प्रभाव नपार्ने प्रस्ट्याए ।

सञ्चारकर्मीहरुसँग नेता शर्माले माओवादीको भागमा परेको प्रदेश नं ६ को मुख्यमन्त्रीको टुङ्गो माघ २५ गते निश्चित रुपमा लाग्ने बताउँदै यसको टुङ्गो लगाउन पार्टीको विधि पद्धतिअनुसार अघि बढ्ने धारणा व्यक्त गरे ।