बुधबार भएको राष्ट्रियसभा निर्वाचनमा एमाले एक्लैको स्पष्ट बहुमत आउन नसकेपनि वाम गठबन्धनको भने बहुमत आएको छ ।

निर्वाचनको पछिल्लो परिणामअनुसार वाम गठबन्धन ३६ सिटमा विजयी भएको निर्बाचन आयोगले जनाएको छ । आयोगका अनुसार ५६ स्थानका लागि भएको निर्वाचनमा कांग्रेसले १३ सिट मात्र जितेको छ भने मधेस केन्द्रित दुई दलले चार सिटमा जित चित्त बुझाएका छन् ।

प्रतिनिधि र प्रदेशसभाको सबैभन्दा ठूलो दल बनेको एमालेले २५ स्थानमा जित हासिल गरेको छ भने माओवादी केन्द्रले ११ सिट मात्रै जितेको छ । उता दोस्रो ठूलो दल नेपाली कांग्रेसले १३ स्थानमा जित हासिल गरेको छ ।

एमालेले सबैभन्दा धेरै प्रदेश नम्बर एक र तीनबाट पाँच–पाँच सिट जितेको छ भने सबैभन्दा काम प्रदेश दुईमा एक सिटमा मात्र सीमित बनेको छ । आयोगका अनुसार एमालेबाट ११ महिला निर्वाचित भए भने कांग्रेसबाट ६ र माओवादीबाट तीन महिला राष्ट्रिसभामा विजयी हुन सफल भएका छन् ।

निर्बाचन आयोगका अनुसार प्रदेश १ बाट एमाले पाँच, कांग्रेस दुई र माओवादी केन्द्र एक स्थानमा विजयी भए भने प्रदेश २ मा कांग्रेस, राष्ट्रिय जनता दल र संघीय समाजवादी फोरम दुई–दुई स्थानमा र एमाले र माओवादी एक–एक स्थानमा विजयी भए ।

प्रदेश ३ मा एमाले पाँच, कांग्रेस दुई र माओवादी एक स्थानमा विजयी भए भने प्रदेश ४ मा कांगे्रस र एमाले तीन–तीन तथा माओवादी दुई स्थानमा विजयी भएका छन् । यस्तै, प्रदेश पाँचबाट एमाले चार, कांग्रेस र माओवादीको दुई–दुई ठाउँमा जित्न सफल भएका छन् । उता, प्रदेश ६ मा एमाले ३, माओवादीले २ जितेका छन् भने प्रदेश सातमा एमालेले चार, कांग्रेस र माओवादीले दुई–दुई सिट जितेको निर्बाचन आयोगले जनाएके छ ।

५९ सदस्य रहने राष्ट्रियसभामा ५६ जना निर्वाचनको प्रक्रियाबाट र बाँकी ३ जनालाई मन्त्रिपरिषद्को सिफारिसमा राष्ट्रपतिले मनोनित गर्ने संवैधानिक व्यवस्था छ । राष्ट्रियसभाका निर्वाचन प्रणालीबाट आउने ५६ सिटमध्ये नेकपा एमालेले २७, नेपाली कांग्रेसले १३, माओवादी केन्द्रले १२ र राजपा र संघीय समाजवादी फोरमले समान २–२ सिट जितेका छन् ।