मुलुकमा तीनै तहको चुनाव सकिएसँगै नयाँ सरकार गठनको बाटो खुल्दै गएको छ । निर्वाचन आयोगले तीन तहको निर्वाचन सकिएसँगै आज राष्ट्रियसभा चुनावको अन्तिम परिणाम राष्ट्रपतिलाई बुझाउने तयारी गरेको छ ।

मन्त्रिपरिषदको सिफारिसमा राष्ट्रपतिले मनोनयन गर्ने तीनजना बाहेक अन्य ५६ जनाको नाम राष्ट्रपति समक्ष पेश गर्ने निर्वाचन आयोगले तयारी गरेको हो ।

राष्ट्रियसभाको निर्वाचनसँगै राजनीतिक दलले संघीय संसदमा पुर्याउनुपर्ने ३३ प्रतिशत महिलाको कोटा निर्धारण भइसकेकाले अब निर्वाचन परिणाम बुझाउन समस्या नरहेको आयोगले जनाएको छ ।

तीनजना मनोनयनको विषय राष्ट्रपतिको अधिकार रहेकाले आयोगले त्यसमा केही गर्ने जनाइएको छ । समाचार स्रोतका अनुसार आयोगले ढिलोमा फागुनको पहिलो हप्ताभित्र प्रतिनिधिसभाको पनि अन्तिम निर्वाचन परिणाम राष्ट्रपतिलाई बुझाउने तयारी गरेको बुझिएको छ । यसले नयाँ सरकार गठनमा बाटो खुल्ने देखिन्छ ।