राष्ट्रिय खेलकुद परिषदका सहायक प्रशिक्षक तथा सल्लाघारी तेक्वान्दो डोजाङका प्रमुख चुलार्ई मुखिया राष्ट्रिय तेक्वान्दो संघ नेपालमा प्रवेश गरेका छन् । चुलार्ई २ सय १८ खेलाडीसहित फागुन २३ गते बुधबार एक कार्यक्रमको आयोजना गरि राष्ट्रिय तेक्वान्दो संघमा प्रबेश गरेका हुन् । उक्त कार्यक्रम भक्तपुर जिल्ला राष्ट्रिय तेक्वान्दो संघका अध्यक्ष द्वारिकानाथ खयरगोलीको सभापतित्वमा भएको थियो ।

चुलार्ई लगायत सिनियर र जुनियर खेलाडीहरुलाई राष्ट्रिय तेक्वान्दो संघका वरिष्ठ उपाध्यक्ष तथा तेक्वान्दोका पूर्व मुख्य प्रशिक्षक ध्रुवबहादुर गुरुङले टीका खादा लगाएर संघमा स्वागत गरेका थिए । सो अवसरमा राष्ट्रिय तेक्वान्दो संघका सल्लाहकार तथा वरिष्ठ शेरबहादुर थापामगर, उपाध्यक्ष हरिबहादुर बुढाथोकी, महासचिव राजकुमार कार्की, सचिव राकेशकुमार राई, प्रदेश नम्वर ३ का संयोजक सनिस लागेजु, प्रदेश नम्वर ५ का संयोजक बुद्धिबहादुर थापाको उपस्थिति रहेको थियो ।

राष्ट्रिय तेक्वान्दो संघमा प्रवेश गर्ने खेलाडीहरुमा ‘थ्री डान’ प्राप्त तीन, ‘टु डान’ प्राप्त १६ र फस्ट डान प्राप्त ३१ जना सहित २ सय १८ जनाले सामुहिक रुपमा प्रबेश गरेका थिए । ति सामुहिक रुपमा प्रबेश गर्ने खेलाडीहरु सर्लाघारी तेक्वान्डो डोजाङ, अक्सफोर्ड तेक्वान्दो डोजाङ र सूर्यविनायक तेक्वान्दो डोजाङका हुन् ।

चुलार्ई तेक्वान्दोमा अव्बल दर्ताका प्रशिक्षकमा गनिन्छन् । २०४८ सालदेखि प्रशिक्षकको भूमिकामा देखिएका चुलाईले सिन्धुली, सुनसरी, सिराह र भक्तपुरमा रहेर तेक्वान्दोको विकास र विस्तारको लागि अहम भूमिका निभाउँदै आएका छन् । २०६० साल अर्थात विगत १५ वर्षदेखि भक्तपुर सल्लाघारीमा तेक्वान्दो डोजाङ संचालन गर्दै आएका चुलार्ईले सो अवसरमा राष्ट्रिय र अन्तर्राष्ट्रिय खेलाडी जन्माउन सफल भएका छन् । चुलार्ईले उत्पादन गरेका खेलाडी सुजन जोशीले एसियाली खेलकुद प्रतियोगितामा प्रतिस्पर्धा गरिसकेका छन् भने अर्का खेलाडी रोहित तामाङले ओलम्पिक छनोट चरणमा प्रतिस्पर्धा गरिसकेका छन् ।

राष्ट्रिय तेक्वान्दो संघमा प्रवेशपछि चुलाईले आफु नेपाल तेक्वान्दो संघको मनपरिको शिकार भएको बताए । आफुले राम्रो काम गर्दा पनि नेपाल तेक्वान्दो संघले कहिल्यै प्रोत्साहन नगरेको आरोप लगाउँदै खेलाडीको उज्ज्वल भविष्यका लागि राष्ट्रिय तेक्वान्दो संघमा प्रबेश गरेको खुलासा गरे । रातदिन मेहनत गर्दा पनि आफु र आफ्ना मातहतका खेलाडीलाई तेक्वान्दो संघले बाईपास गरेको र खेलाडीहरुको मनोबल गिराउने कार्य गरेकोले आफु तेक्वान्दो संघ छोडन बाध्य भएको बताए ।