राजकुमार चाल्र्स तथा दिवङ्गत बेलायती राजकुमारी डायनाका पुत्र प्रिन्स विलियम केही समययता केट मिडलटन नामक युवतीसँग प्रेम सम्बन्धमा रहेको विषयले निकै चर्चा पाइसकेको छ । यस बहुचर्चित जोडीको छिट्टै विवाह हुने भएको छ । बहुचर्चित राजकुमारीका बहुचर्चित पुत्रको विवाहले पनि त्यही स्तरको चासो र चर्चा त पाउने नै भयो । यो जोडीको विवाह समारोह प्रत्यक्ष हेर्न धेरै बेलायती तथा अन्यले पनि इच्छा गरेका छन्, तर यो सम्भव हुने कुरा भएन । सबैलाई निम्ता गरेर विवाहमा प्रत्यक्ष सहभागी गराउन चाहेर पनि बकिङ्घम प्यालेसले सक्ने कुरा भएन ।
तर, यसरी विलियम र केटको विवाहलाई प्रत्यक्ष अवलोकन गर्न चाहनेहरूले निराश हुनुनपर्ने भएको छ । बेलायती अखबार डेली मेलले जनाएअनुसार यो विवाह समारोहको थ्री डी फिल्म बन्ने भएको छ । यो फिल्म हेर्नेले यस्तो अनुभूति गर्नेछन् कि मानौँ आफू प्रत्यक्ष रूपमा सो विवाह कार्यक्रममा सरिक भइएको छ । तर, यसरी विलियम-केटको विवाहलाई प्रत्यक्ष अनुभूति गर्न चाहनेहरूको सपना पूरा हुनचाहिँ अझै केही संशय बाँकी नै छ । किनकि, सो शाही विवाह समारोहको थ्री डी फिल्म बनाएर प्रसारण गर्नका लागि बकिङ्घम प्यालेसले अनुमति दिइसकेको छैन । सोबारे प्रक्रिया चलिरहेको अखबारले जनाएको छ । जे होस्, सोको स्वीकृति मिलेपछि त शाही विवाहमा सबैलाई प्रत्यक्ष सहभागी हुने निम्तो मिलेसरह हुँदैन त ?
पक्राउ खाने आशङ्काले बुस त्रस्त
कुनै अपराध गरेको छ भने प्रहरीबाट लुकिछिपी हिँड्नु अपराधीको चरित्र हो । यो व्यवहार हामीकहाँ मात्र होइन विश्वव्यापी रूपमै चलिआएको देखिन्छ । कुनै पहुँच नभएको सर्वसाधारण व्यक्तिले कुनै अपराधप्रति डराएर भाग्नु/छल्नु अस्वाभाविक पनि हुँदैन, तर विश्वकै सर्वशक्तिमान राष्ट्रको सर्वोच्च ओहोदामा रहिसकेका व्यक्ति पक्राउ पर्ने डरले लुक्ने या छल्ने गर्छन् भने त्यस अवस्थालाई के भन्ने ?
हो, यस्तै परिस्थितिबाट गुज्रनुपर्यो अमेरिकाका पूर्वराष्ट्रपति जर्ज बुसले । गत १२ फेबु्रअरी ?माघ २९ गते शनिबार) का दिन स्वीजरल्यान्डको जेनेभामा आयोजित एक च्यारिटी समारोहमा बुस भाषणका लागि आमन्त्रित थिए । त्यहाँ सहभागी हुने निर्णय पनि उनले गरिसकेका थिए । तर, एकाएक उनले आफ्नो जेनेभा भ्रमण रद्द गरिदिए । भएछ के भने जेनेभामा सक्रिय एक मानवअधिकारवादी समूहले बुसलाई पक्रन स्वीस सरकारसमक्ष माग गरेछ । बुस अमेरिकाका राष्ट्रपति रहँदा ग्वाँटानामोमा एक आतङ्कवादीले मुख खोल्न अस्वीकार गरेपछि उसबाट अपराध ओकलाउन पानीमा डुबाउने सजाय दिन बुससँग आदेश मागिएको रहेछ र बुसले पनि ‘आवश्यक परेकै हो भने पानीमा चोपलेर भए पनि बयान लिनू’ भन्ने आदेश दिएका रहेछन् । यो कुरा उनले हालै एक टेलिभिजन अन्तर्वार्तामा स्वीकार पनि गरिसकेका छन् । यही ‘अपराध’ गरेबापत अधिकारकर्मीहरूले जेनेभा आउँदा बुसलाई पक्रिनुपर्ने माग गरेका थिए । यो खबर पाएपछि गिरफ्तारीको डरले बुसले जेनेभा भ्रमण नै रद्द गरिदिए । तर, स्वीस अधिकारीहरूले भने एक पूर्वराष्ट्रपतिका नाताले बुसमाथि सो उजुरीका आधारमा कारबाही नगरिने प्रतिक्रिया दिएका थिए ।
गर्भनिरोधक चक्की खाने पालो पुरुषको
गर्भनिरोधका लागि अनेक प्रकारका औषधि चक्की खानुपर्ने एकहोरो जिम्मेवारी अब महिलाबाट बाँडिएर पुरुषको काँधमा समेत पर्ने भएको छ । बेलायतको इडेनवर्ग विश्वविद्यालयका वैज्ञानिकहरूले पुरुषका लागि गर्भनिरोध खाने चक्कीको सफलताका साथ प्रयोग गरेका र अब छिट्टै यो बजारमा आउने दाबी गरेपछि विश्वभरका महिलाका लागि यो सुखद खबर बन्न पुगेको हो । विश्व स्वास्थ्य सङ्गठनले समेत विश्वका दुई सय दम्पतीमाथि यसको परीक्षण गरिएको र महिलाले खाने चक्कीजत्तिकै सफल परिणाम प्राप्त भएको पुष्टि गरेको छ । कण्डमको तुलनामा पुरुषले खाने चक्की गर्भनिरोधका लागि बढ्ता प्रभावकारी सावित भएको पनि बताइएको छ ।
हत्याराको स्याहार गरेर जीवन गुजारा
जसले आफ्नो बाबुको हत्या गर्यो उक्त हत्याराकै सेवा गरेर जीवन गुजारा गर्नुपर्दा कस्तो अनुभूति होला ? हो, उडिसा भारतका एक युवक यसो गर्न विवश बनेका छन् र बाबुको हत्याराको रेखदेख गरेबापत उनलाई दिनको डेढ सय रुपैयाँ कमाइ हुन्छ ।
उडिसा अभयारम्यनिवासी मधुसूदन बहेरा नामक २२ वर्षो युवकका बाबुलाई केही वर्षअघि एउटा गोहीले आक्रमण गरेर ज्यान लिएको थियो । त्यसपछि गोही भनेपछि मधुसूदनलाई ‘एलर्जी’ लाग्न थाल्यो । यसबीच रोजगारीका लागि उनले चौतर्फी प्रयत्न गरे, तर अन्तत: रोजगारी मिल्यो उही हत्यारा गोहीलाई स्याहार गर्नुपर्ने † आफ्नो भाग्यप्रति सुरुमा त उनी बेस्सरी निराश बने तर अन्तिममा उनले विवेक पुर्याएर निर्णय गरे कि उनले गोहीको सेवा गर्नैपर्छ । बिचरो यो जनावर हो, यसलाई के थाहा के गर्नु उचित र के अनुचित हो भन्ने ? यसको सेवा गरे मलाई पनि पुण्य नै मिल्ला ।-नविन उप्रेती
प्रतिक्रिया