राष्ट्रिय खेलकुद परिषद्का सदस्यसचिव केशवकुमार विष्टले इन्डोनेसियमा हुने आसन्न १८ औं एसियाली खेलकुदको तयारीलाई लक्षित गरी खेलाडीको विशेष बन्दप्रशिक्षण आगामी वैशाखदेखि सुरु हुने बताएका छन् ।

राखेपअन्तर्गत राष्ट्रिय टिम तयारीको आयोजनामा सातदोबाटोमा सुरु एनएससी हाइ लेभल स्पोर्ट्स साइन्स एन्ड प्लानिङ सेमिनारको उदघाटन गर्दै सदस्यसचिव विष्टले भने– ‘अहिले सञ्चालन भइरहेको राष्ट्रिय टिम तयारीको प्रशिक्षण चैतसम्म चल्नेछ । त्यसपछि एसियाली खेलकुदलाई मध्यनजर गरी बैशाखदेखि विशेष बन्द प्रशिक्षण सुरु गर्ने छौं ।’

सदस्य–सचिव विष्टले वैज्ञानिक पद्धतिबाट खेलाडीलाई प्रशिक्षण गराउने विधिबारे जानकारी दिने उद्देश्यले प्रशिक्षकका लागि सेमिनार सञ्चालन गरिएको बताए ।

राष्ट्रिय टिममा रहेका विभिनन १५ खेलका प्रशिक्षकलाई समावेश गरी सेमिनार सञ्चालन गरिएको राष्ट्रिय टिम तयारीका निर्देशक अर्जुन विकले जानकारी गराए । सेमिनारलाई दुई चरणमा विजभाजन गरी सञ्चालन गरिएको छ ।

पहिलो चरणमा मार्सल आर्ट बाहेकका खेल स्क्वास, आर्चरी, भारोत्तोलन, सुटिङ, एथलेटिक्स, टेबलटेनिस, पौडी र ब्याडमिन्टनका ३१ प्रशिक्षक सहभागी छन् । पहिलो चरण चैत ८ गतेसम्म चल्नेछ । दोश्रो चरणको सेमिनार चैत १२ देखि १६ गतेसम्म सञ्चलन हुनेछ । त्यसमा तेक्वान्दो, कराते, जुडो, कुस्ती, बक्सिङ र उसुका ३७ प्रशिक्षक सहभागी हुनेछन् । सेमिनारका कोर्ष डाइरेक्टर सुशीलनरसिंह राणा र डा. ज्ञानेन्द्र शाहले सेमिनार सञ्चालन गर्नेछन् ।