आफ्नै वडावासी एक व्यक्तिबाट कुटपिट गरिएका पाँचथरको हिलिहाङ गाउँपालिका–७ का वडाध्यक्ष तीर्थराज तिम्सिनाको मृत्यु भएको छ । उपचारका क्रममा झापातर्फ लैजाँदै गर्दा इलामको नेपालटार पुगेपछि तिम्सिनाको मृत्यु भएको हो ।

वडाको सडक विस्तार गर्ने विषयमा विवाद भएपछि सोही गाउँका भीमबहादुर योक्पाङले वडाध्यक्ष तिम्सिनामाथि हातपात गरेका थिए । गत विहिबार उक्त घटना भएलगत्तै तिम्सिनाले योक्पाङविरुद्ध प्रहरीमा सार्वजनिक अपराधसम्बन्धी जाहेरी दिएका थिए । जाहेरी दिएको २४ घण्टा बित्न नपाउँदै तिम्सिनाको मृत्यु भएको राससले जनाएको छ ।

योक्पाङदेनले आफूमाथि हातपात गरेको भन्दै तिम्सिनाले जाहेरी दर्ता गराएको पाँचथरका प्रहरी नायब उपरीक्षक बामदेव गौतमले पुष्टि गरेका छन् । झापा लैजाँदै गर्दा वडाध्यक्षको शुक्रबार मृत्यु भएको हो ।

यसैगरी, पाँचथरकै फालेलुङ गाउँपालिका–६ का वडा सदस्य कमल गुरुङले एक महिलालाई जबरजस्ती करणी गरेको रहस्य सार्वजनिक भएको छ । पीडित महिलाले गुरुङले आफूलाई जबरजस्ती करणी गरी गर्भवती बनाएको उजुरी दिएपछि प्रहरीले गुरुङलाई आज शनिबार पक्राउ गरेको हो ।

पक्राउ गरिएका गुरुङविरुद्ध जबर्जस्ती करणी मुद्दाअन्तर्गत म्याद थप गरी अनुसन्धान थालिएको पाँचथर प्रहरीले जनाएको छ ।