मि. फिटनेश फस्र्टको आयोजानामा ‘स्वास्थ नै धन हो’ भन्ने मूल नाराका साथ चौथो अन्तरक्लब मि. फिटनेश फस्र्ट शारीरिक सुगठन तथा मेन्स स्पोर्टस् फिजिक च्याम्पियनसिप चैत्र २४ गतेदेखि आयोजना हुने भएको छ ।

प्रतियोगिता सतुङ्गल पार्टी प्यालेसमा आयोजना हुने छ । क्लबका आफ्नै तीन शाखाहरुमा प्रशिक्षण लिईरहेका खेलाडीहरुका विच प्रतिस्पर्धा हुने आयोजक संघका बुद्धिजंग कार्कीले पत्रकार सम्मेलनमा जानकारी गराएका छन् ।

प्रतियोगितामा ६०, ७०, ७० केजीमाथि तौल समूह तथा स्पोर्टस फिजिक तर्फ १६५ र १६५ सेमि माथि समूहमा प्रतिस्पर्धा गराईने पनि कार्कीले जानकारी गराए ।

तौल समूहतर्फका प्रत्येक तौल समूहका प्रथम, द्वितीय र तृतीय हुने खेलाडीहरुलाई स्वर्ण, रजत र कास्यका साथै प्रमाण पत्र प्रदान गरिने छ । त्यस्तै चौथो तथा पाँचौ हुने खेलाडीले ट्रफी, टि–सर्ट तथा प्रमाण पत्र प्राप्त गर्नेछन् ।

समूहगतबाट पहिलो हुने खेलाडीहरुविच पुनः ओभरअल प्रतिस्पर्धा गराई “मि. फिटनेश फस्र्ट”को उपाधिबाट सम्मान गरिने छ । ओभरअलमा पहिलो दोश्रो र तेश्रो हुने खेलाडीहरुले क्रमशः नगद ३५ हजार, २० हजार र १० हजारका साथै ट्रफि, सप्लिमेन्ट, टि–सर्ट र ब्यानेटले सुसज्जित गरिने छ ।

यस्तै यिनै प्रतिस्पर्धिहरु मध्येबाट एक जना खेलाडी उत्कृष्ट पोजर घोषित हुने छन् । बेष्ट पोजरले नगद ५ हजारका साथै ट्रफी प्राप्त गर्ने छन् । फिजिक तर्फ पहिलो हुने खेलाडीले नगद १५ हजारका साथै स्वर्ण, ट्रफि, सप्लिमेन्ट, टि–सर्ट र ब्यानेटले सुसज्जित हुने छन् । दोश्रो हुने खेलाडीले रजत पदकका साथै ट्रफि, सप्लिमेन्ट, टि–सर्ट र ब्यानेट तथा तेश्रो हुनेले कास्य पदकका साथै ट्रफि, सप्लिमेन्ट, टि–सर्ट र ब्यानेटले सुसज्जित हुनेछन् ।

करिब ६ लाख ५० हजार राशीको अनुमानित बजेट रहेको प्रतियोगिताका दौरान राष्ट्रिय तथा अन्तर्राष्ट्रिय प्रतियोगितामा विजयी क्लबका खेलाडीहरुलाई सम्मान पत्रद्वारा सम्मान गरिने पनि पत्रकार सम्मेलनमा जानकारी गराईएको छ ।