नेपालले आज उपहारस्वरूप चीन सरकारलाई पठाउन लागेको दोस्रो चरणको एकसिंगे गैंडा हस्तान्तरणको कार्यक्रम स्थगित भएको छ ।

सम्पूर्ण तयारी पूरा भए पनि गैंडा पुऱ्याइने चीनको गोन्जाओमा अहिले भीषण हावाहुरी चलेका कारण सो कार्यक्रम स्थगित भएको बताइएको छ ।

मंगलबार चितवन राष्ट्रिय निकुञ्जको पूर्वी सौराहाबाट दोस्रो चरणका लागि मितिनी र सोल्टी नामका एकजोडी गैंडा चीन पठाउनका लागि काठमाडौं ल्याइपुऱ्याएको छ । काठमाडौं ल्याइएका गैंडा कार्गो बोइङमा राखेर नेपालबाट चीन लैजाने कार्यक्रम तय भएको छ । गोन्जाओमा आएको भीषण आँधीबेहरीका कारण कार्गो बोइङ अवतरण गर्न नसक्ने भएकाले उक्त कार्यक्रम आजलाई स्थगित भएको हो ।

आज चिनियाँ पक्षलाई गैंडा हस्तान्तरण गर्ने कार्यक्रम राखिए पनि त्यसको सट्टा भोलि साँझ ६ बजेका लागि सो कार्यक्रम तय भएको छ । भोलि साँझ वनमन्त्री शक्तिबहादुर बस्नेतले चिनियाँ पक्षलाई गैंडा हस्तान्तरण गर्नेछन् ।

चीनलाई दुई जोडी गैंडा पठाउने सरकारको निर्णयअन्तर्गत गत असार २६ गते पनि डेढ वर्षको भद्र र २ वर्षकी रुपसीलाई पहिलो चरणअन्तर्गत बिदाइ गरिएको थियो ।

यसपटक नेपालबाट लगिएको गैंडालाई चीनको सांघाई वाइल्ड एनिमल पार्कमा राखिनेछ । यसअघि लगिएका रूपसी र भद्रलाई चीन चिमेलाङ पार्कमा राखिएको थियो ।