शुक्रबारका लागि बोलाइएको कांग्रेस केन्द्रीय समितिको बैठक बस्दै नबसी शनिबारसम्मका लागि स्थगित भएको छ । आज बस्ने भनिएको बैठक भोलि बिहान ११ बजेसम्मका लागि स्थगित भएको हो ।

आज बिहान ११ बजेका लागि बोलाइएको बैठक अपराह्न साढे ४ बजे मात्र स्थगित भएको जानकारी केन्द्रीय सदस्यहरूलाई गराइएको थियो ।

कांग्रेसले बिहीबार गठन गरेको विधान मस्यौदा समितिमा असन्तुष्टि जनाउँदै रामचन्द्र पौडेल पक्षका नेता शुक्रबार बिहानको बैठकमा उपस्थित भएनन् । ९ सदस्यीय बनाउने भनिएको समिति ११ सदस्यीय बनाइएपछि पौडेल पक्षले असन्तुष्टि जनाएसँगै बैठक भोलि बिहान ११ बजेसम्मका लागि स्थगित गरिएको हो ।

बिहान सभापति शेरबहादुर देउवा, वरिष्ठ नेता पौडेलसहित पदाधिकारीको बैठक बसेको थियो । सो बैठकमा पौडेलले विधान मस्यौदा समिति गठनमा असन्तुष्टि जनाएका थिए ।