नेत्रविक्रम चन्द विप्लव नेतृत्वको नेपाल कम्युनिष्ट पार्टीका प्रवक्ता प्रकाण्डलाई अदालतले फेरि तीन दिन थुनामा राख्न अनुमति दिएको छ । नुवाकोट जिल्ला अदालतले अनुसन्धानका लागि तीन दिन म्याद थप गरेको हो । जिल्ला प्रहरी कार्यालयले एक हप्ता थुनामा राख्ने म्याद मागे पनि अदालतले तीन दिन मात्र म्याद दिएको छ ।

प्रकाण्डलाई गत साउन ७ गते राति नुवाकोटको बेलकोटगढी –९ भट्टथोकमा दुई स्काभेटरमा जलाएको आरोपमा मुद्दा चलाउन नुवाकोट लगिएको जिल्ला प्रहरी प्रमुख एसपी वसन्तबहादुर कुँवरलाई उद्धृत गर्दै राससले जनाएको छ । बताइएअनुसार धमले–जिलिङ सडक स्तरोन्नतिको काम गर्दै आएको नागार्जुन कन्ट्रक्सनका दुई स्काभेटरमा आगो लगाइएको थियो ।

नेकपाका दोस्रो बरियतामा रहेका प्रकाण्डलाई गत शुक्रबार बिहान काठमाडौंंमा पक्राउ गरी नुवाकोट लगिएको थियो । अदालतमा म्याद थपका लागि लैजाने क्रममा उनले आफूलाई राजनीतिक प्रतिशोधका लागि पक्राउ गरिएको र नुवाकोटको स्काभेटर जलाएका विषयमा आफ्नो संलग्नता नभएको जिकिर गरेका छन् ।