अब वैदेशिक रोजगारीमा गएका नागरिकले स्वदेशमा फर्किएर कुनै व्यवसाय गर्न चाहेमा त्यस्ता व्यक्तिले व्यवसाय हेरी रु. १० लाखसम्म सस्तो ब्याजदरमा ऋण पाउने भएका छन् । अर्थ मन्त्रालयले आजदेखि ल्याएको एकीकृत ब्याज अनुदान कार्यविधिले त्यस्ता नेपाली नागरिकलाई परियोजना धितोमा ऋण दिने व्यवस्था गरेको छ ।
थोरैमा ६ महिना विदेशमा काम गरेर फर्किएको र स्वदेश फर्किएको ३ वर्ष ननाघेका नेपाली नागरिकले आफूले सिकेको सीपअनुसारको व्यवसाय गर्न चाहेमा परियोजना धितोमा राखेर ऋण पाउने एकीकृत ब्याज अनुदान कार्यविधिमा उल्लेख छ ।
पाँच वर्ष कर्जा अवधि रहेको यस्तो ऋणको ब्याजदर भने बैंकले तोकेको आधार ब्याजदरभन्दा २ प्रतिशत मात्र बढी हुने बताइएको छ । जसमा ५ प्रतिशत सरकारले तिरिदिने उल्लेख छ ।
यस्तो ऋणका लागि नेपाल राष्ट्र बैंकबाट अनुमति प्राप्त सबै बैंक तथा वित्तीय संस्थामा आवेदन दिन सकिनेछ । तर, ऋण लिँदा प्रमाणको रूपमा भिसा, पासपोर्ट, फर्किएको देशको कागज, सिकेको सीप, अनुभवको प्रमाणपत्र र विदेशी नागरिक नभएको घोषणा गर्नुपर्नेछ ।
प्रतिक्रिया